Linog miguba sa balay sa mga taga Diocese sa Kidapawan, apan wala makatandog sa pagtuo sa katawhan

Gisuportaan ni Diocese of Kidapawan Bishop Jose Colin Bagaforo, DD ang gisugilon ni Catholic Bishops Conference of the Philippines President ug Davao Archbishop Romulo Valles, DD nga bisan nakatagamtam sa kalamidad ang katawhan sa Diocese of Kidapawan kon North Cotabato nagpabiling lig-on ang ilang pagtuo sa Labawng Makagagahom.

Sumala ni Bishop Bagaforo nga human mitay-og ang kayutaan niadtong Octubre 16, 29 ug 31, 2019 nagpabiling nasinati sa katawhan sa lugar ang ginatawag nga aftershocks busa ang katawhan kon residente wala una namalik sa ilang tagsa-tagsa ka mga lugar, ilabina nga kadaghanan sa mga balay, nangaguba sa linog.

Apan ang Obispo nagdugang nga bisan kapila gilinog ang North Cotabato, ingun man nangaguba ang ilang kapuy-an, nagpabiling lig-on ang pagtuo sa katawhan ngadto sa Dios.

“Salamat sa Ginoo, ang mga tao, nagpabiling isog, lalom ug buhi ilang pagtuo,” dugang sa Obispo.

Sumala sa Obispo nga nagmisa siya niadtong Domingo sa Mary Mediatrix Cathedral ug sa usa ka kapilya, ang katawhan tungod sa kadaghan mi-awas na sa simbahan.

“Panahon sa kalamidad, ang Ginoo ra gyud ang nahimong gisandigan sa mga tao, maong padayon sila nga naningkamot aron mo bangon,” dugang ni Bp. Bagaforo.

Mahinunduman nga si Archbishop Valles, atol sa iyang homiliya sa San Pedro Cathedral, alas sinko sa hapon niadtong Nobyembre 11, 2019 isip pag-able sa 4th BEC National Assembly iyang gipaambit ang iyang kasinatian sa pagbisita sa mga namakwit tungod apektado sa linog sa maong lugar, diin adunay usa ka myembro sa pamilya nga mipadayag sa kalig-on sa pagtuo, tungod gisiguro gayud sa pagsalbar ang mga imahe ni Birhen Maria, San Isidro Labrador ug Santo Niño.

Samtang dakong suliran karon kung hain na mohikling ang mga residente sa duha ka Barangay sa Kidapawan City ug walo ka Barangay sa Makilala, North Cotabato tungod gideklara kini sa gobyerno nga “No Build Zone” tungod delikado ang lugar sa pagdahili sa yuta.