Kapistahan sa Parokya ni San Juan Pablo II

Linghod pa lang sa panuigan apan puno sa grasya ang kasaulugan sa ika-8 ka tuig nga kapistahan sa St. John Paul II Parish sa Los Amigos, Tugbok District ning dakbayan.

Gipanguluhan ni Most Rev. Romulo G. Valles, D.D., ang CBCP President ug Archbishop sa Davao, ang kasaulugan sa Santos nga Misa sa maong kapistahan niadtong Oktubre 22 tuig kasamtangan.

“Nalipay akog dako nga nakahigayon ako sa pag-adto sa inyong ika-8 nga pagpyesta sa parokya,” pahayag ni Abp. Valles.

“Dugang usab nga kalipay nga ang Arsobispo nga nahimong labing instrumento sa desisyon nga mahimo kitang parokya ania karon dinhi, si Abp. Nanding Capalla,” dugang niya.

Niadtong tuig 2011, samtang si Archbishop Emeritus Fernando Capalla pa ang Arsobispo sa Dabaw, natukod ang maong parokya.

Sa iyang homiliya, gipasabot ni Valles ang kahulugan sa adlaw sa maong kapistahan.

“Nasayod kita, sa gibatbat sa introduksyon, nga namatay si San Juan Pablo II bulan sa Abril, dungan sa Divine Mercy Sunday,” segun ni Abp. Valles.

“Apan kanang pistaha, usab-usab ang adlaw. Maong maayo sab nga kini nga adlaw atong napili tungod mahinungdanon usab kini. Mao kini ang adlaw sa pagproklamar niya isip Santos o ang iyang canonization,” dugang pamahayag niya.

Gipasabot usab sa Arsobispo ang mensahe sa maong kapistahan.

“Kada tuig, mamalandong kita unsa man ang buhi nga mensahe alang kanato? Dili kini ato-ato lang apan ang mensahe sa Diyos alang sa atong espirituwal nga kinabuhi,” tataw niya.

“Ang Diyos ang nagbutang kang San Juan Pablo II ug nagbuot nga mudan-ag siya tungod sa kahibulongang kahayag sa iyang mga maayong buhat ug pagtulon-an,” iyang gipasabot.