Ika-71 nga kapistahan sa Sto. Rosario

Mabungahon ang kasaulogan sa ika-71 nga kapistahan sa Parokya sa Sto. Rosario sa Toril.

Sa pagpangulo sa Santos nga Misa ni Most Rev. Romulo G. Valles, D.D., ang CBCP President & Archbishop sa Davao, iyang gipunto ang pagkamahinungdanon sa debosyon ngadto kang Birhen Maria, partikular sa Birhen sa Sto. Rosario.

“Ang atong debosyon sa Mahal nga Birhen usa ka nindot nga debosyon ug pagtoong katoliko. Ang mahal nga Birhen magdala kanato balik kay Hesus,” segun sa Arsobispo sa iyang homiliya.

“Ang atong pagnovena sa Mahal nga Birhen, kining pyesta karon, makatabang kanato sa pagsaka sa langit,” dugang niya.

Gipasabot sab ni Arsobispo Valles ang pagkamasinugtanon sa Ginoo sama kang Maria.

“Ang giingon sa Mahal nga Birhen, intawon buhata ang iyang gisugo kaninyo. Gikan sa kasingkasing ni Maria, niingon siya, Matuman unta dinhi kanako ang gipamulong sa Ginoo,” pamahayag niya.

Iyang gipadayag usab ang iyang kalipay ug dako nga siya nahiuban sa mga parokyano sa kapistahan karon sa parokya sa Toril.

“Hinumdumi, ang naghimok nato nga ug nagtulod kaninyo nga manimba bisag adlawng ting-trabaho, mao ang atong kasingkasing nga adunay pagtuo,” pagpasabot ni Arsobispo Valles.

Dugang niya, ang kasingkasing nga adunay pagtuo musulti nga “muanhi ako, musimba ako, dunay kalabutan kini sa akong kinabuhi.”

Iya usab giaghat ang mga parokyano nga mutabang sa pagpahibalo sa uban sa ilang kasinatian sa gasa sa pagtuo.

“Daghan sa mga tao ang dili tigsimbahan wala kabalo unsay nakuha ninyo karon,” tataw ni Arsobispo Valles.

“Palihog, ingna ang uban sa kinasingkasing nga pagkasulti nga naa moy kasinatian nga muanhi sa simbahan tungod sa gasa sa pagtuo,” siya miingon.