Christian Leadership Seminar sa OMPH Bajada Parish

Nanambong niadtong November 17, 2019 sa ala una y medya (1:30) sa hapon ang mga bag-ong GKK servant leaders (GSL) sa gipahigayon nga Christian Leadership Seminar sa parokya kauban ang 4th year seminarian nga si Bro. Bonn Barreto didto sa 3rd Floor Parish Pastoral Building. Mga GSL sa zone 5-7 ang mga nanambong gidugangan sa ubang GSL sa zone 1-4 nga wala makatambong tungod kay wala sila sa ilang schedule last Sunday.

Kasagaran tunga-tunga na sa seminar ang mga pangpawala sa tulog pero sa kani nga higayon human sa pagbasa sa giandam nga unang pag-ampo gisunod dayon ang “chicken dance” nga lingaw himoon. Dayon gihatag ang katuyoan sa pagtapok, tulo (3) ka katuyoan. Ug para mas maalerto pa ang tanan adunay duha (2) ka pangutana nga gihatag si Bro. Bonn. Ug para dili na magbalhin-balhin kay daghan baya mi ang imong tapad mao na ang imong kaestorya.

Giandam ang tubag kay manawag siya ug sharer. Adunay lima (5) ka sharer nga nagreport sa resulta sa ilang panaghisgot. Sa lima (5) nga sharer adunay isa (1) ka youth nga mishare usab. Adunay panagsama sa ubang tubag aduna usab daghan nga dili pero ang nakapamalandong na sa grupo mao na ang pagsugod ug hatag sa input ni Brod Bonn diin iyang gi-emphasize nga si Jesukristo ang pinakaperfect nga example sa usa ka maayong lider.

Matod pa niya “ang modelo sa Kristohanong Pangulo mao mismo si Hesus, ang sentro sa pagkapangulo. Sa bibliya makita nimo ang nagkalain-laing teksto nga mahimong gabayan sa pagpangulo ug pagpangalagad. Ang mga mensahe ni Hesus sa iyang pagsangyaw, nagpadayag ug mga pagtulon-an sa kinaiya sa pagkapangulo.”

Matod pa ni Brother Bonn Adunay walo (8) ka mga dapat andamon aron mamahimong maayong Pangulo sama sa Ginoong Hesus; una, ang pagpangandam sa kaugalingon (Si Hesus nagpabunyag, nagfasting for 40 days); ikaduha, pagtawag sa mga tinun-an ug paghatag nila ug ilang mga tahas; ikatulo, pakig-uban sa mga tawo (mokaon kauban sa iyang mga tinun-an, miuban ug midapig sa mga kabos, nakighigala sa mga Samaryanhon uban pa); ikaupat, pagka-maalagaron (mga pag-ayo sa masakiton); ikalima, pagkamagtutudlo ni Hesus; ika-unom ang pagkamaampoon ni Hesus; ika-pito, pagkamabinantayon ni Hesus (sa mga signs of times); ika-walo, pagkamaunongon ni Hesus sa iyang Misyon (sa pagsangyaw sa Maayong Balita alang sa kaluwasan nga nagpadayag sa dakong gugma sa Diyos alang sa katawhan).

Mihatag usab si Brod Bonn bahin sa kung unsa pud ang pagka Pangulo sumala ni San Pablo. Adunay siyam (9) nga gi-enumerate si San Pablo.

Sa summarized version si Hesus isip modelo sa pagkaPangulo usa ka organizer, misyonero, makigduyog, makig-dialogue, moalagad, magsasangyaw, magbalantay, maampoon, magtutudlo, mapasayloon, nagapakabana.

Aduna usab distinction nga gihatag bahin sa gahum nga iya sa kalibotan ug gahum nga iya sa gingharian sa Diyos, trese (13) kini ka buok.

Human sa input nga gihatag ni Brod. Bonn misunod ang paghimo og personal prayer dayon ang katapusang pag-ampo inubanan sa pagsunog sa mga gisulat nga pag-ampo sa mga nanambong.

Lisod sundon ang mga nahibaloan o nakat-onan namo sa maong formation pero nagalaum mi nga sa hinay-hinay masunod namo ang mga gilatid nga mga perfect example sa atong Ginoong Hesus ug nga pinaagi sa iyang panalangin mahuman namo ang among termino isip mga lideres sa mosunod nga upat (4) ka tuig. (Marieta V. Comighud | OMPH SocCom Coordinator)