BEC – Gikan sa Misa ngadto sa Lamesa

Gikan sa Misa ngadto sa Lamesa… Kini ang sagad nakong mahinumduman sa daghan nakong kasinatian niining maong Gagmayng Kristohanong Katilingban (GKK). Lahi ra sa kasagarang kasinatian sa Parokya.

Sa Misa…

Pag-abot gayud ngadto sa katilingbang misahan sugaton ka dayon sa mga alagad. Kuhaon dayon ang mga kagamitan sa Misa aron andamon. Balitaan ka unsa nay nahitabo sa palibot: ang masakiton nga nabisitahan; ang niabot nga silingan gikan sa gawas nasud; o ang anak nga nakapasar sa pasulit. Pangumustahon pod ka kon sakit pa ba ang imong lutahan ug hanyagan og bisan unsa na lang nga tambal nga ilang pod nga giinom, gihampol ug gihaplas ba kaha; saaran ka pa nga nga padal-an pagkahuman sa Misa o hatdan sa kombento mismo.

Mag-abot abot ang uban pang mga sakop sa katilingban ug hapiton ka sa pultahan aron timbayaon. Ang mga bata mo-amen pa. Magkapuliki ka kay moduol bisan naa pa kay kaestorya aron mopakita nga naa sila ug pasalamatan ka sa pagbisita ug pagmisa. Kasamtangan, magsugod ang paglinya ang mga mo-alagad sa Misa nga usahay maglibog kinsay maulahi ug kinsay mauna. Unya tautaud madunggan ang tingog sa nagabasa sa pasiuna, ug dayon ang tanan manganta nga naglanoglanog ang tingog; ang uban pinakurog pa: “Daygon ta ang Ginoo uban sa mga instrumento, ang kalipay ta isinggit, ang Ginoo labing hingpit…Tugtuga na ang gitara…”

Magmisa ka nga lahi ra ang pagbati ikomparar sa parokya kay ang tanan nagkaila. Dili hinuon ang tanan sa katilingban ang motambong pero baya kon ato gayud nga isipon, adunay higayon nga mas dako dako pa ang porsiyento sa katilingban ang nanimba ikomparar niadtong didto sa parokya kon tibuok pod parokya ang basihan. Mamahimo pa natong iapil sa pag-ihap ang mga iro nga miuban nga usahay magbugno. Apan sabton na lang kay mao may proteksiyon sa uban sa ilang pagtadlas sa kalibunan. Ang uban adunay papel sa Misa: magbabasa, salmista, mokanta ug moduyog pa, mangolekta, magpakalawat, ug mo-abag sa Misa nga magkurogkurog kay walay maanad apan naningkamot gihapon. Giampo ang tanang panginahanglan sa kasilinganan uban sa mga halad nga gikan gayud sa kaumahan og timaan sa pagpasalamat. Modawat ang tanan nga mahinangpon sa Lawas ni Kristo. Apan bisan pa man sa pag-ingon sa pari “Tapos na ang Misa, manglakaw kita uban ang kalinaw ni Kristo”, dili pa gayud matapos ang tanan ni manglakaw ang uban. Adunay pay lamesa nga tambongan.

Sa lamesa…

Nakaandam ang nagkadaiyang pagkaon; dala sa mga sakop sa katilingban. Kini ambitan sa tanan. Paunhon ang pari ug mga kauban sa pagkaon, apan mosunod usab dayon ang uban. Adunay saging, kamote, ug uban pang lagutmon. Apan dili gihapon mawala ang kan-on ug ang mga lamiang sud-an: tinibuok nga manok, sinugbang isda, ug humba. Apan dili lang pagkaon ang saluhan. Padayon ang estorya nga nagsugdan. Mahibaloan kinsay nagluod ug wala na mosimba, ang nasuko o nag-away ba, pero naulian ra pod ug nag-uli na. Mahisgutan mga proyektong nasugdan, gipadayon pa, o nahuman na, ang umaabot nga mga kalihukan sa katilingban, mga pangutana ug kalibog sa uban…daghan.

Sa pagkaon nga dala dili gyud magkulang…gani maghinubra pa. Ang uban magputos aron dal-on sa balay. Apan dili gayud makalimtan ang bahin ug iya sa pari ug mga kauban…gani, mas daghan pa. Salamat sa Dios, busog ang tanan…

Lahi ra ang Gagmayng Kristohanong Katilingban (sa amo diay dinhi sa Pagadian ang tawag namo niini “Gagmayng Simbahanong Katilingban”) ikomparar sa parokya kay ang kasaulugan gikan man sa Misa ngadto sa lamesa. (Bp. Ronald Lunas | Bishop of Pagadian)