Sa Tagum, GKK Gipangga, Gigasahan ug Gisangonan

Agig pagpangandam sa pagsaulog sa tibuok nasud sa ika-500 ka tuig nga selebrasyon sa Kristyanismo dinhi sa Pilipinas, ang Diyosis sa Tagum nagsaulog usab sa ika-50 ka Tuig sa pagkamugna sa ilang Gagmayng Kristohanong Katilingban, niadtong Oktobre 12, 2019.

“Ang paghinumdom maoy usa ka pagpabalik sa Presensya” matud pa sa usa ka manunulat. Tinuod mibalik lantaw ang Diyosis sa Tagum sa mga gibuhat sa mga misyonero nga mga Maryknoll Fathers niini nga lugar. Labaw sa tanan, ilang gihandom ang ika 25 ka tuig sa kamatayon ni Bishop Joseph Reagan, pinaagi sa paghimo sa responso- o rito sa pag-ampo didto sa iyang lubong nga nahimutang sa sulod sa Daang Christ the King Cathedral sa Rizal Street, Tagum City.

Ang ilang gipakitang Audio Visual, niadtong adlawa, nagsaysay sa pag-imbita ni Bishop Clovis Thibault sa Davao City, sa mga Maryknoll Fathers nga magmisyon didto sa Davao del Norte tuig 1965. Matud pa ni Bishop Medel Aseo ang Obispo sa pagkakaron: ”Gihalad gayud sa mga Maryknoll Fathers ang ilang mga resources, panahon ug bahandi nga makapundar sila sa mga mahinungdanong mga projekto alang sa katawhan.” Nakapatukod sila ug ospital, nasugdan nila ang pagpadagan sa Apostolado sa Legion of Mary, nahiusa nila ug natudloan ang mga katekista, namugna nila ang pagtabang sa mga Lumad, nakapatindog sila sa us aka seminary alang sa pag-eskwela sa mga batan-on alang sa pagka-pari ug daghan pang mga nasugdan nga mga proyekto alang sa katawhan. Labaw sa tanan nasugdan nila pagmugna ang Gagmayng Kristohanong Katilingban-tuig 1975.

Padayon ni Bishop Medil Aseo: “Naingon kami karon tungod kanila nga mga Maryknoll Fathers. Busa gisinati namo karon ang diwa sa pagpasalamat ngadto kanila, kay sila ang gasa Sa Diyosis sa Tagum. Tungod sa ilang paningkamot, milambo ug midaghan ang mga local nga pari sa Diyosis, nga mao usab ang miabag kanila sa pagpalambo sa GKK. Miabot pa gani nianang adlawa si Fr. Navaira, usa ka lumad nga pari gikan sa Tagum, nga siya mismo ang pioneer sa pagpalambo sa GKK uban sa mga paring Amerikano. Ang mga pari sa Tagum, mikabat na sa labaw sa 140, sa pagkakaron. Nasundan si Bishop Joseph Reagan, ni Bishop Dean, unya ni Bishop Manlapaz ug ang ikaupat mao si Bishop Medil Aseo. “Nasugdan na man nako ang pagpadayon sa buhat sa pagpalambo sa GKK, kay ang matag Obispo adunay papel sa pagpalambo ug pagpatunhay sa GKK dinhi sa Diyosis sa Tagum.”

Matud pa ni Father Ariel Garcia ang ilang Pastoral Director: “Angay nga pasalamatan ang Dios sa ika-50 ka Tuig sukad mamugna ang GKK. Dili lamang tungod sa numero nga 50 kondili mapamalandongan ang kaugalingong kasinatian sa paglambo ug pagtubo sa katawhan sa ilang pagtuo. Tinuod, gikan sa Gagmayng Kristohanong Katilingban, sila karon nahilambigit ngadto sa parokya, ug hangtud na ngadto sa dakung Diyosis. Nagsugod gani sila sa paghimo ug ‘pilot area’, alang sa pag-exprimento. Sama pananglit sa gitawag nga Nabunturan Deanary ug Lupon Deanary ang unang mga “pilot area” sa Gagmayng Kristohanong Katilingban.

Nianang adlawa, ang kasaulogan, nagsugod didto sa Daang Christ the King Cathedral diin sa nasulat ko na nga gipakita ang hamubong Audio Visual ug ang rito sa pag-ampo o ‘responso’ sa lubong ni Bishop Joseph Reagan. Nag-motorcade ang mga tawo uban sa mga pari padulong sa Bag-ong Cathedral, alang sa mga giandam nga programa. Sulod sa program mao ang pagpaambit sa mga Resource speakers nga mao ang mosunod: Most Rev. George Rimando, D.D. ang Auxiliary Bishop sa Archdiocese sa Davao, Rev. Msgr. Ulysses Perandos, Sr. Epifania Mipaña, ACR, Mr. Mark Ningwa, Mrs. Lolita Palanas, Milo Virtudez ug Waren Felix. Ang mga pakigpulong, agig tubag sa mga giandam nga mga pagutana, gihan-ay inubanan sa mga intermission nga pasundayag, sama sa Historical Drama presentation through dances, sa mga seminarista sa Queen of the Apostles College Seminary, Awit sa MCPI singers, Silver Jubilarians nga mga Pari, ug espesyal number sa mga paring elderly, inubanan ni Bishop Medil Aseo. D. D. Gi-koronahan, kining dakung kasaulogan sa ika-50 ka Tuig sa GKK sa Tagum Diyosis, pinaagi sa Santos nga Misa nga mao ang labing makahuluganong pagpasalamat sa Dios, nga gi-salmotan sa hapit tanang mga pari sa Diyosis nga gipangulohan ni Bishop Medil Aseo, D.D. Sama sa naandan, human sa Santos nga Misa, adunay gi-andam nga lamesa alang sa tanan! Dalaygon ang Dios!