PSP sa OLLP nakigduyog sa Laudato Si’

“Pagdayeg alang kanimo o Ginoo.”

Agi’g pagdayeg sa Ginoo nga maoy magbubuhat sa atong kinabuhi ug sa tanang kinaiyahan, ang mga Pangulo sa Panudlo (PSP) sa parokya sa Our Lady of Lourdes, sa Bangkal, nakigduyog sa hagit sa tibook simbahan diha sa panawagan ni Papa Francisco sa iyang Encyclical Laudato Si’ sa pagpakabana ug pag-amping sa atong pinuy-anan.

Niadtong Septyembre 14 sa buntag atol sa binulan nga panagtigum, nagpahigayon og pagpanglimpyo sa palibot sa simbahan. Gisugdan kini pinaagi sa pag-ampo alang sa kinaiyahan una ang pagpanglimpyo.

“Unya gibutang sa Ginoong Diyos ang tawo sa tanaman sa Eden aron maoy mag-atiman ug magbantay niini.” (Gen. 2:15)

Pinasikad sa Pulong sa Dios, ang mga Pangulo sa Panudlo nagpaambit sa pagtoo pinaagi sa kongkretong aksyon nga ang atong kasinatian sa Ginoo sa kanunay inubanan sa usa ka dakong responsibilidad.

Sa pagmugna sa Amahan sa kalibutan, siya nagapanalangin sa tawo diha sa paghatag kaniya og yuta, kagawasan, kaangayan, kinabuhi ug gugma. Tugbang niini nadawat usab sa tawo ang kaakuhan sa pag-atiman ug pag-amping niining tanan.

Ang nahitabo sa kinatibuk-ang palibot, ug gani bag-o pa lamang dinhi sa Bangkal nahiagum sa usa ka dakong pagbaha, kini nagkinahanglan na gyod sa dakong pagtagad. Ang mga kalihukan sama sa gipasiugdahan sa pakigduyog sa Encyclical Laudato Si’ maayong buluhaton ug mas maayong buhaton sa kanunay.

Ang pagpanglimpyo, malipayon namo kining gihimo, nga bisan sa simple namo nga pagpanilhig, usa na ka dakong kontribusyon sa atong giatubang nga problema sa climate change.

Human sa maong kalihukan, gisunod ang meeting diin usa sa mga gihisgotan nga dili na angay mogamit og mga plastic sa among tagsatagsa ka panimalay, sa pagpamalengke o bisan gani sa mga sudlanan sa halad panahon sa misa. (Elizabeth Corsiga | OLLP Pangulo sa Panudlo)