Mga Katekista sa OLLP ug mga Magtutudlo nagkahiusa

Mga Katekista sa Parokya sa Our Lady of Lourdes sa Bangkal, nga gipangunahan ni Ana Norbe, Pastoral Coordinator ug Head Catechist, miduyog sa mga magtutudlo sa Gov. Vicente Duterte National High School, Bangkal, Siyudad sa Davao, aron sa pagsaulog sa Teacher’s month pinaagi sa Santos nga Misa, niadtong Oktubre 1 sa campus gym nga gitambungan sa gatusan ka mga magtutungha gikan sa grades 7, 8, 9, 10, 11 ug 12. Si Fr. Arnulfo Cubero, resident priest sa OLLP, maoy nangulo sa kasaulogan sa misa, diin iyang gihatagan og maayong pagpalawom ug pagpasabot ang gipadayag sa Ebanghelyo bahin sa unwelcome Samaritan.

Kauban sa maong pagsaulog ang duha ka Seminarian nga sila si Cel Canico ug Jay Palaca nga usa usab ka alumni sa maong tulunghaan.

Adunay lima ka tulunghaan nga sakop sa parokya sa Lourdes nga mao ang Gov. Vicente Duterte National High School, Dona Soledad Dolor Elementary School, Don Leon Elementary School, Kids Camp ug Hofmann Global School, ang gialagaran sa tumang pagpailob ug kalipay nga ang tumong mao ang pagtudlo sa doktrina sa katolikong simbahan ug magiyahan ang mga kabataan ug makaila sa Dios makagagahum ug mahigugmaon sa tanan.

Dako ang pagpasalamat ni Mr. Romeo Camilotes, school principal sa GVDNHS sa gipakitang kakugi ug kadasig sa mga katekista sa parokya sa Lourdes sa paghatag og katekismo bisan sa makausa ra kini sa usa ka semana. Buot usab ipaabot ni Mr. Camilotes kang Reb. Padre Leonie H. Espana, kura paroko, sa iyang pagpadala og mga katekista sa maong tulunghaan aron makigtambayayong sa mga magtutudlo ug mga ginikanan sa pag-umol sa mga kabataan sa pagpuyo ug pagbuhat og mga butang nga makalipay sa atong Ginoo.

Ang kasinatian sa usa ka misyon, sama sa paghatag og kaalam ug pagpaduol sa mga kabatan-onan nakahatag gayud og kaugmaon sa mga kabataan ug nahimong inspirasyon sa mga katekista sa pagpadayon sa pagpakaylap sa mensahe sa Balaang Kasulatan bisan niining yano nga pamaagi. (Elenita B. Biag | OLLP PSP Coordinator)