Ika-33 ka tuig nga Parochial Fiesta gisaulog

“Pagkamasinugtanon ni Birhen Maria: Sumbanan ug Kadasig sa Mapadayonong Pagpangalagad uban sa Kabatan-onan” ang nahimong tema sa pagsaulog sa ika-33 ka tuig nga kapistahan sa Parokya sa St. Mary of the Perpetual Rosary Parish sa Buhangin, Davao City niining adlawa Oktubre 6, 2019.

Usa kini ka hagit dili lamang sa mga kabatan-onan kondili sa tanang mga GKK Servant Leaders (GSL) sa nagkadaiyang katilingban sa parokya nga unta madasig sila kanunay ug mapadayonong pag-alagad diha sa ilang matag ministriya nga gikuptan.

Talagsaon nga kalipay ang nasinati sa mga parokyano niining pagsaulog sa ika-33 ka tuig sa kapistahan sa parokya tungod kay mikabat og usa ka bulan kapin ang pagsaulog niini.

Niadtong Agosto 3, 2019 gisugdan ang pagpangandam sa kapistahan pinaagi sa panaw duaw sa Mahal na Patron – Santa Maria sa Kanunay’ng Pagrosaryo ngadto sa 54 ka mga Gagmay’ng Kristohanong Katilingban (GKK) nga nahisakop sa Parokya.

Pinaagi niining panaw duaw daghang parokyano ang nagpadayag nga nadasig ug nalig-on ang ilang debosyon ngadto sa Mahal nga Birhen.

Paghatod balik sa Parokya sa Mahal nga Birhen gisugdan ang novena prayer ug Misa sa Septyembre 27, 2019 hangtud Oktubre 5, 2019 ug gipahigayon ang prusisyon sa bisperas sa kapistahan.

Adunay gipahigayon nga choral song competition niadtong Septyembre 22, 2019 diin adunay unom (6) ka mga choir groups ang nisalmot niini nga ilang gibuhatan og tono ang composition sa kura paroko, Fr. Dionisio C. Tabiliran nga adunay titulo: “Maria, ang among Sumbanan”.

Ang grupo nga makadaug sa competition maoy gamiton nga theme song sa kasaulogan sa kapistahan.

Gipakita usab sa mga kabatan-onan ang ilang mga talento sa pagsayaw, pagkanta ug pagtula niadtong Septyembre 27, 2019 isip mga Talentadong Anak ni Maria.

Gipahigayon ang pagkumpirma ni Arsobispo Romulo G. Valles, D.D. sa 350 ka mga kabataan ug hamtong nga mga parokyano niadtong Septyembre 28, 2019.

Adunay GKK night niadtong Septyembre 29, 2019 diin nagpakita og kahanas sa pagsayaw ang mga pangulo sa nagkadaiyang ministriya ug PARECO night sa Oktubre 1, 2019 nga ang pangulo ug miembro sa mga parish recognized organizations nagpasundayag sa ilang mga talento.

Niining adlaw sa kapistahan, Oktubre 6, 2019 ang mga kalihukan mao kining mosunod:

5:00 a.m. Mass – presider, Fr. Rey T. Sabuero
6:30 a.m. Mass – presider, Fr. William S. Cajes
8:00 a.m. Mass – presider, Fr. Dionisio C. Tabiliran
9:30 a.m. Pontifical Mass – presider, Archbishop Romulo G. Valles, D.D.
10:30 a.m. – Fiesta Program – Parlor Games, Presentations
11:00 a.m. – Baptismal Ceremony – presider, Fr. Rey T. Sabuero
4:00 p.m. Mass – presider, Fr. Dionisio C. Tabiliran
5:30 p.m. Mass – presider, Fr. Ritsche J. Gamaya

Malipayong pagsaulog sa kapistahan sa Mahal nga Birhen sa Kanunay’ng Pagrosaryo. Viva Maria! (Hermie Mapute | SMPRP SoCCom)