Children’s Catechesis nagpunting sa pagka-piniyalan

Napuno ug mi-awas sa simbahan sa Ascension of the Lord Parish ang mga kabataan nga nagpangidaron ug singko ngadto sa dose anyos niadtong Septembre 29, 2019.

Bisan ug oras sa tingkatulog ug nabati pa ang kainit sa kahaponon, mabati ang madasigon nga mga tingog sa kabataan sa pagsulod sa simbahan alang sa paglusad sa Children’s Catechesis nga nagtumong sa pagka-piniyalan.

Gisaulog ni Reb. Padre Zenon B. Ampong, kura paroko ang Santos nga Misa nga gitagana alang sa mga kabataan kinsa nagpadayag sa iyang kalipay nga nagsud-ong sa mga kabataan kinsa maoy tudluan sa pipila ka mga Sabado sa mga Pangulo sa Panudlo sa 39 ka mga GKK ubos sa Ascension of the Lord Parish.

Unang higayon kini nga gipakanaog ngadto sa kabataan ang programa sa Stewardship sa parokya isip katumanan sa panglantaw ug misyon nga himoong malangkubon ug intensibo ang pagka-piniyalan sa matag parokyano lakip na ang kabataan.

Dakong pasalamat ni Padre Ampong sa mga kabataan kinsa maoy nahimong kabahin sa liturhiya sama sa nagkanta, nagduiyog, nagbasa, nangolekta (gift gatherer) ug labaw sa tanan, naghalad sa ilang mga gasa.

Sunod nga gipasalamatan niya mao ang mga katekista kon mga Pangulo sa Panudlo kinsay maoy nagpahimutang ug nag-atiman sa mga kabataan aron nga malampusong mahimo ang Children’s Mass.

Gipakita sa mga kabataan ang ilang kaakuhan nga mamahimong maayong mga piniyalan pinaagi sa pagtahan sa ilang kaugalingon aron lamang makat-on sa Maayong Balita ug mamahimong mga maayong mga Kristyanos.