Am I in love?

Dear Sister,

Sister, grade seven na ko karon nga nag-edad og 13. Sister, na attract ako karon sa usa ka lalaki sa samang pangedaron. Sa dihang una ko siyang nakita, wala pa ako makasinati og bisan unsa nga pagbati. Apan sa diha nga kanunay ko na siyang nakita sa among mga meetings, kay lider man siya sa ilang grupo sama kanako, namatikdan ko nga kanunay molukso ang pinitik sa akong kasingkasing, kung makita ko siya. Dili lang kay excited kaayo ako kung makita ko siya kondili happy pa gyud ako kaayo. Tungod niini, absent-minded na kaayo ako sa akong pag-eskwela kay na-aninaw na nako nga kami na. Akong giingnan ang akong friend mahitungod niini. Unya miingon siya nga in-love na daw ako. Dili ko makatuo kay bata pa man ako. Ang uban miingon nga crush ko lang daw siya. Busa naglibog ako ug wala usab ako kahibalo kon unsa ang in-love. Sultihi ko Sister. Tinuod ba nga in-love na ako?

C.G.

* * * * * *

Dear C.G.,

Yes, C.G. Tinunod nga in-love ka na. Unsa man ang gugma? Usa kini ka pagbati nga kita makasinati ug kalainan sa atong panglantaw sa atong kaugalingon, sa uban ug sa kalibutan, ilabina kon makaatubang nato ang tawo nga atong gihigugma. Sa edad nga 13, dili na ikaw bata, bisan kon dili ka pa hingpit nga usa ka hamtong. Apan dili ka pa andam sa kaminyoon. Ang imong pangidaron anaa sa tunga-tunga kinsa tanan miagi ug nakasinati sa pagpadulong sa pagkahamtong. Apan ayaw kabalaka, C.G. tungod kay nagtuo ako kon ang Dios naghatag kanato og kasingkasing, iya usab seguradohon nga motrabaho kini sa tukmang paagi. Ayaw kahadlok sa imong gibati. Sa pagkatinuod usa kini ka maanindot nga pagbati nga atong masinati tungod kay nagsulti kini kanato nga sa kanunay maningkamot kita nga mamahimong buotan ug maayong tawo sa kalibutan ilabina ngadto niadtong tawong atong gihigugma. Ang gugma makatabang kanato sa pagdiskobre, nga aduna diay maayo nga anaa sa atong kinahiladman ug mao kini ang tinubdan sa atong kusog ug inspirasyon. Karon nga aduna nay espesyal nga tawo sa imong kinabuhi, paningkamuti nga ikaw mismo usa ka espesyal nga babaye alang kaniya nga imong gihigugma.

From Sister