1,500 ka mga Lumad magtigom sa Sirib

Dinhi sa Arkidiyoses sa Dabaw gipahigayon karon nga panagtigum sa dili moubos o kapin sa 1,500 ka mga lumad didto sa GKK La Purisima, Sirib sa Parokya sa San Francisco de Asis ubos sa pagdumala sa kura paroko nga si Rev. Fr. Mark Jann Perez, OSJ.

Usa sa tumong sa panagtigum gikan sa katilingbang lumad sa Bagobo Klata sa mga Barangay sa Tamayong, Kawayan, Manuel Guianga, Subasta ug Sirib mao ang Interreligious Dialogue, aron masinati labi na gayud sa mga kabataan ang kultura ug paghisgot sa mga hisgotanan nga naa sa katilingban sa kasamtangan. Kini ubos nga pagdumala sa Chairman sa Ancestral Domain Management Office ug Tribal Chieftain sa Sirib nga si Datu Rosalito Anog.

Sa alas kwatro sa hapon adunay Santos nga Misa nga pagahimoon didto sa San Lorenzo Ruiz Parish, Talomo aron isaulog usab ang Domingo sa mga Lumad sa maong parokya nga panguluhan ni Rev. Fr. Florencio Acedo, Jr., DCD ang kasamtangang IPA Director sa Arkidiyoses sa Davao.

Aduna usab mga selebrasyon sa tribu didto sa katilingban sa Toroyan ug Kibalatong sakop sa misyon sa Missionary of the Assumption. Ang IP Month nga giablihan niadtong nilabayng Domingo didto sa Diocese of Marbel taposon pinaagi sa Tree Planting didto sa Sitio Pamantawan sa Malabog district sa katapusang Domingo. Kini gipanghinaut nga makahatag og igong pagtagad alang sa kalambuan sa atong kaigsoonang lumad. (Genaro Guadalquiver Jr. | IPA Coordinator)