Youth Cross Culmination ug Youth Camp Launching gipahigayon

“Hits Two Birds in One Stone” mao kini ang nahitabo nga kalihukan sa mga batan-on sa St. Mary of the Perpetual Rosary Parish niadtong Agosto 25, 2019. Niining adlawa gipahigayon ang GKK Youth Cross Visitation Culmination ug opisyal nga paglunsad kon Launching sa Parish Youth Camp. Gisugdan ang panagtapok sa mga batan-on uban ang mga GKK Servant Leaders (GSL) pinaagi sa Santos nga Misa sa alas nuebe y medya sa buntag nga gipangulohan sa Parochial Vicar, Rev. Fr. Rey T. Sabuero.

Pagkahuman sa Santos nga Misa gipahigayon ang programa diin madasigon nga gipresenta sa mga batan-on ang ilang nagkadaiyang cheers and yells panahon sa parade sa mga representante sa ministriya sa batan-on sa napulo ka zona ug sa Parish Youth Ministry (PYM) organizations sama sa St. Mary Youth Choir, Youth for Christ, St. Mary Assistance Rescue Team ug mga GSL. Gisugdan ang kalihukan pinaagi sa enthronement sa Youth Cross ug pagkanta sa St. Mary Choir inubanan sa Doxology sa St. Mary Youth Animators.

Ang unang bahin sa programa mao ang pagpahigayon og culmination tungod sa nagmalampuson nga GKK Youth Cross Visitation ngadto sa 55 ka mga GKK nga nahisakop sa Parokya atol niining tuig sa pagsaulog sa Year of the Youth. Tungod sa suporta ug madasigon nga pag participar sa mga GSL sa maong kalihukan, ang PYM coordinator, Jonalen Asares uban ang Kura Paroko, Fr. Dionisio Tabiliran ug PYM Spiritual Director, Fr. Rey Sabuero nihatag og sertipiko isip pasalamat kanila ug gipasundayag ang audio visual presentation isip balik lantaw sa mga nahitabo nga kalihukan sa youth cross visitation sa matag GKK.

Ang ikaduhang bahin mao ang opisyal nga gilunsad ang Parish Youth Camp diin pagahimoon kini karong umaabot nga Oktubre 28-30, 2019. Ang tema sa maong kasaulogan. Kabatan-onan ni Santa Maria sa Kanunay’ng Pagrosaryo: Hinigugma. Gigasahan. Gipiyalan ug Gahum.

Timaan sa pag-abli sa maong kalihukan gipasundayag sa St. Mary Youth Animators ang official animation para sa Youth Camp ug ang pagpahibalo sa mga detalye nini.

Gipadayag sa Kura Paroko, Rev. Fr. Dionisio C. Tabiliran ang importansya sa mga batan-on sa katilingban ug sa simbahan isip mga sumusunod nga mga lideres. Nanghinaut usab si Fr. Diony nga magpadayon ang mga batan-on sa ilang pagserbisyo diha sa simbahan ug sa kanunay magpabilin sa pagsiga ang pagtoo diha sa ilaha.

Mapasalamaton ang Parish Youth Ministry (PYM) coordinator, Jonalen Asares sa kalampusan sa maong aktibidades ug sa makanunayong suporta sa Kura Paroko, Fr. Dionisio C. Tabiliran ug sa Parochial Vicar ug Spiritual Director sa mga batan-on, Fr. Rey T. Sabuero.

Ingon man usab mapasalamaton si Fr. Rey T. Sabuero sa suporta sa mga GSL sa nagkadaiyang GKK sa pagsalig sa mga batan-on nga moserbisyo sa ilang katilingban ngadto sa parokya. Nanghinaut si Fr. Rey nga pinaagi sa maong mga aktibidades mamahimong molambo ang ministriya sa batan-on diha sa ilahang pagtoo ug pagtuman sa ilang misyon diha sa simbahan. (Mae Villanueva, PYM / Hermie Mapute, SMPRP SoCCom)