Training alang sa pinasahing pagluto

Nagpahigayon og training ang Archdiocesan Social Action Center (ASAC) Davao team mahitungod sa pinasahi nga paagi sa pagluto.

Pinaagi sa maong kalihukan, gipasabot ni Mrs. Rose Boquiren ang mga partisipante unsaon pagluto nga gamit lamang ang nuog o panapton nga gisulod sa lata. Aron mahimo ang maong pagluto, kinahanglan nga bubuan og denatured alcohol human gisindahan.

Gawas sa grupo gikan sa ASAC, milingkod usab ang mga Parish Social Action Ministry (PSAM) Coordinators ug mga kaubang Pangulo sa Alagad (PSA) sa nagkadaiyang parokya sakop sa Arkidiyoses niadtong Septyembre 14, 2019 alas 9 sa buntag hantud alas 11 sa udto sa San Pedro Cathedral.

Lakip sa mga potahi alang sa mga PSA mao ang lumpia, burger ug bola-bola nga gamit ang panit sa saging nga gilata ug gitimplahan human gisagulan og harina ug itlog dayon giprito. Matod pa sa mga PSA nga maoy nikaon sa ilang giluto nga lami kini ug pwede ipang negosyo.

Gitudluan usab sila sa paghimo og sugnod sama sa oling gamit ang mga papel. Kini gihulom sa tubig aron mahumok ug gipug-an ug giporma sama sa usa ka gagmay’ng bola human ibulad. Inig kauga sa maong gipormang pangsugnod pwede na kining gamiton pangluto sama sa oling nga igo na lang sindihan.

Ang ulahing gitudlo mao ang pagrecycle sa mga “used cellophane ug plastic wrappers” pinaagi sa pagsulod niini sa mga botelya sa ” bottled water” ug mahimo na kining ikural sa palibot sa mga tanom.

Dugang pang pagtulun-an ang takdang ipaambit ni Boquiren sa umaabot nga mga skedyul sa sunod higayon.

Nagpasalamat ang tanan sa maong training kay kada usa adunay nabitbit nga kahibalo nga ila usab ipaambit ngadto sa ilang parokya paingon sa nagkadaiyang GKK diin sila nahisakop. (Ester Constancio Florece)