Sultan gikasal sa San Miguel Panacan

Dakong gugma ug pagsalig sa Dios ang sekreto sa malampuson ug malipayon nga kaminyoon sa magtiayong Engr. Rudy ug Linda Sultan.

Sa ikaduhang higayon sa ilang kaminyoon, gipahigayon ang pagbag-o sa panaad sa kaminyoon o second vow of marriage sa magtiayong Sultan. Kini nahitabo niadtong Agosto 31, 2019 sa alas dos sa hapon sa parokya ni Sr. San Miguel sa Panacan.

Usa ka espesyal nga seremonyas nga gipangulohan sa kura paroko Rev. Fr. Edsel Paloma kauban usab ang kanhing mga kura paroko sa San Miguel Panacan Fr. Jovil Bongay, Fr. Jun Gemino ug Fr. Babes Bastasa.

Ang kura paroko naghisgot sa duha ka klase nga kaminyoon.

Una niini, ang kaminyoon nga gitukod sa balas nga diin usa ka huyang nga relasyon tungod kay kung mabahaan kini mabanlas lamang kini. Sama usab sa kaminyoon nga huyang inig adunay mga problema dili kasagang magbulag.

Ang ika-duha ang kaminyoon nga gitukod sa bato nga kung bisan unsa pa nga unos dili kini mabungkag ug maanod tungod kay pulido gayud.

Gikumpara ni Fr. Paloma ang kaminyoon sa Sultan gitukod sa usa ka bato tungod sa kalig-on niini. Gitataw usab niya nga ang sekreto sa malampuson nga kaminyoon mao ang fidelity, trust, gentleness, communication, acceptance ug faithfulness ug kini iyang nakita sa magtiayon.

Ang yanong Rudy gikan sa Ilo-ilo ug nahuman sa iyang pagtungha sa Gensan.

Naabot siya sa syudad sa Dabaw tungod sa iyang trabaho ug dinhi niya nakita ang iyang hinigugma ug gipakaslan nga si Linda sa nag-edad pa kini nga dice nueve (19) samtang si Engr. Rudy 26.

Adunay lima (5) ka mga anak ang magtiayon nga puros usab malampuson sa ilang kaminyoon ug negosyo.

Sumala pa ni Engr. Sultan wala niya gipangayo nga makaabot og 50 katuig ang ilang kaminyoon apan iyang gina-ampo ang maayong panglawas sa tibook pamilya.

Sumala pa, sama sa uban magtiayon aduna usab mga pagsulay sa ilang kaminyoon ilabina sa klase sa iyang trabaho ug negosyo nga exposed sa mga kalingawan. Apan alang kaniya nakatabang ang iyang mga nakita sa iyang mga kaubanan nga nabungkag ang kaminyoon tungod sa bisyo ug nahimo kini niyang sumbanan. Sumala pa ni Linda dakong gugma ug pagsalig ang iyang sekreto sa ilang kaminyoon diha sa iyang bana ug puno sa pagpasalamat sa Ginoo tungod sa kabuutan, good provider ug adunay dakong pagtoo sa Ginoo si Rudy.

Ang magtiayong Sultan puno sa gugma. Dili ikalimod daghan ang midayeg ug naghimo kanila nga inspirasyon ilabina sa sulod sa parokya sa San Miguel. Sukad pa sa sinugdan sa parokya nagserbisyo isip Lay Minister si Rudy samtang CWL si Linda ug kasamtangan nagpadayon pa sa pagserbesyo ug usab mga miyembro sa Parish Coordinating Council ug Finance Council.

Sa among Pilantropo sa San Miguel Panacan Engr. Rudy ug Linda Sultan, long live ug MABUHAY ANG BAGONG KASAL (ulit)! (Liz Gilbuena | SMP SoCCom)