“Pinaagi ni Maria Mediatrix atong Inahan, kita Gihigugma, Gigasahan, Gigamhan, alang sa Misyon”

Niadtong Agosto 22,2019 gisaulog sa Mary Mediatrix of All Grace Cathedral sa Digos City ang ika-68th Patronal Fiesta nga ang Tema: “Pinaagi ni MARIA MEDIATRIX atong INAHAN, kita GIHIGUGMA, GIGASAHAN, GIGAMHAN, alang sa MISYON.”

Adunay pito ka misa niaanang adlawa. Sa ikatulong misa sa 7:30AM ang nagsaulog mao si Most Rev. Jose Colin M. Bagaforo, D.D., ang Obispo sa Kidapawan, ug sa iyang mensahe gihatagan niyag importansya ang pag-ampo sa rosaryo tungod kay mao kini ang ginabalikbalik paghangyo kanato sa atong Mahal nga Inahang Maria sa matag higayon nga siya nagapakita.

Ang ikaupat nga misa (9:30AM) gisaulog ni Most Rev. Guillermo Afable, D.D., ang Obispo sa Digos, diin iyang gipasalamatan ang Diyos nga 68 na ka tuig nga nagatoo ug nagasalig ang katawhan sa Digos kang Maria Mediatrix of All Grace o Tigpataliwala sa Grasya.

Sa paghinumdum niya sa sinugdanan sa maong simbahan, gipahinumduman usab ni Bp. Afable ang mga parokyano nga ang tinuod nga simbahan dili lamang ang estruktura nga gihimo sa bato ug semento apan ang tinuod nga simbahan mao kini ang mga tawo nga nagatoo, nahigugma, ug nagatuman sa mga sugo sa Diyos, sama ni Maria ang unang simbahan. Gihagit usab ni Bp. Afable nga mahimo kitang sama ni Maria ug magpadayon unta ang pagsimba ug pag-alagad nato sa Diyos ug sa Iyang Anak nga si Hesus ug ato kining ipasa sa sunod pa nga mga henerasyon. (Dr. Manalee Araune)