Parents’ Day sa Propaedeutic Seminary Makahuluganon

Nagmalampuson ug nagmakahuloganon ang gipahigayong Parents’ Day sa St. Francis Xavier Propaedeutic Seminary niadtong Domingo, Sept. 15 sa Ulas niining dakbayan.

Ang Propaedeutic Seminary, ang kanhi Pre-College Seminary, gimugna isip tubag sa mando sa halangdong Santo Papa Francisco pinaagi sa iyang gipagula nga dokumento, Ratio Fundamentalis Institutionis Sacerdotalis. Gilunsad sa Archdiocese of Davao kining bag-o ug nga programa sa pormasyon karong tuiga alang sa mga nakahuman na og Senior High, kolehiyo, mga kasamtangang anaa sa kolehiyo, ug young professionals.

Subay sa maong dokumento, ang tanang buot magpari sa lokal nga simbahan, kinahanglang moagi og Propaedeutic Year. Ang Propaedeutic Year mao ang usa ka tuig nga pagpamalandong ug pagpangandam una pa ang mga tuig sa pormasyon sa Pilosopiya ug Teolohiya.

Kabahin sa maong programa ang nagkalain-laing mga pamaagi ug aspeto sama sa adlaw-adlaw nga pagsaulog sa Santos nga Misa, pag-ampo, pagsimba sa Balaang Sakramento, ug ang nagkadaiyang aspeto usab sa natad sa human formation. Ang tumong ug tinguha nga pinaagi niining mga pamaagi ug aspeto mas mapalawom pa sa usa ka seminarista ang iyang pagpamalandong ug pag-abli sa iyang kasingkasing aron sa pagpaminaw sa tingog sa Ginoo kung dinhi niining kinabuhia ba siya gitawag o sa lain ba kahang matang sa bokasyon.

Tungod kay ang pamilya dako man og kabahin sa pagpamalandong ug paglambo sa bokasyon, gipasidunggan kini pinaagi sa nahisgutan na sa unahan nga Parents’ Day. Mitambong ang kapin siento singkwenta (150) ka mga ginikanan, kaparyentehan, kahigalaan, ug mga session facilitators/resource persons sa baynte-singko (25) ka mga seminarista.

Gisugdan ang tibuok adlaw nga kalihukan pinaagi sa Santos nga Misa sa alas otso sa buntag nga gipangulohan ni Rev. Fr. Elvie Bordios, DCD, ang Propaedeutic Year Coordinator. Gisundan kini og pag-inambitay og mga kasinatian. Ang mga ginikanan, kauban ang ilang mga anak, nagpaambit mahitungod sa pagpakiglambigit sa pamilya sa bokasyon sa pagkapari.

Tapos ang pag-inambitay, gitapok ang mga ginikanan, kabatan-onan ug kabataan sa nagkalain-laing lugar. Ang mga ginikanan mitambong sa input nga gihatag ni Fr. Elvie Bordios ug ni Bro. Jerick Asdang, ang Propaedeutic Year Companion. Ang mga kabatan-onan gihatagan sa mga seminarista og pagpasabot mahitungod sa bokasyon, samtang ang mga kabataan nagdula-dula pinaagi’g mga Parlor Games.

Human mabusog ang tanan sa gipanag-ambitan nga paniudto, gisugdan dayon untop ala una y media ang mga pasundayag nga giandam sa mga seminarista. Mahigugmaon ug madasigon nga gidalit sa mga seminarista ang ilang mga talento sa pag-awit, pagsayaw ug pag-arte alang sa ilang mga mahal sa kinabuhi. Natandog pag-ayo ang matag-usa sa panahon sa Tribute to Parents kon diin gihatagan sa mga seminarista ang ilang mga ginikanan og rosas ug gamay’ng pahalipay samtang nagdalit og usa ka awit.

Usa usab sa mga naglangkob sa mga pasundayag mao ang sugilanon nga nag-ulohan, “Tungod kaninyo, ania ako,” nga mao usab ang napiling tema sa maong Parents’ Day. Ang gipasundayag nga sugilanon nagsaysay sa kinabuhi sa usa ka batan-ong lalaki nga pinaagi sa iyang pamilya nakabati sa tawag sa Dios ug mi-desisyon nga mag pari. (Eldie Barrientos)