Paglantaw sa pagkapari

Ang bokasyon usa ka paglakaw nga magsugod sa yanong pangedaron ug matapos lamang kung matapos na usab ang kinabuhi sa usa ka tawo.

Si Rev. Alfredo Bustamante, Jr., 29 ang edad, taga Panabo, bag-ohay lamang naordinahan isip diakono.

Siya kay nagpasagop sa parokya sa Bunawan nga nahimong iyang ikaduhang panimalay samtang siya nagatapos sa iyang High School sa tunghaan sa Holy Cross of Bunawan.

Sa iyang pagtubo sulod sa seminaryo, siya nagdesisyon nga iyahang dal-on ang parokya sa Bunawan.

Sa bata pa lamang si Rev. Bustamante, adunay amigo ang iyang pamilya nga usa ka pari. Dinhi nagsugod ang iyang panlantaw nga mosulod usab sa relihiyosong bokasyon.

Nagsugod siya isip usa ka altar boy ug sa hinay-hinay nagtubo na diha sulod kaniya ang pagtuman sa tawag sa bokasyon sa pagkapari.

Sa iyang pagka-aktibo sa simbahan, mas napalawman pa niya ang mga kasinatian nga nagpalawom sa iyang pagtuo. Ang maong pagpangalagad ang mas nagtukmod kaniya ipadayon ang iyang mga pangandoy nga mahimong alagad sa Ginoo.

Dungag usab sa iyang pag-alagad mao ang inspirasyon gikan sa iyang higalang pari nga kanunay naga-aghat kaniya nga mopadayon.

Sumala pa kay Rev. Bustamante, kung baliklantawon niya ang iyang mga kasinatian diha sa pagtubag sa tawag sa pagkapari, ang iyang una nga pamalandong mao ang iyang mga kasinatian ug mga pagpanudlo nga iyang nakuha mao gayud ang nagtuklod kaniya nga mopadulong sa lugar kung diin siya karon.

Dugang niya, ang mga taong iyang nakaila nahimong instrumento gayud sa iyang pag-ila sa plano sa Ginoo kaniya.

Bisan pa man sa iyang pagka-ordinaryong bata, nasayod si Rev. Bustamante nga ang pagpuyo sa usa ka kinabuhi nga puno og pagtuo maghatag og dalan sa pagpaminaw sa tawag sa Ginoo. (Princess Jasmin Herrero)