Mga GSL sa ALP gi-andam alang sa PBBR

Sayo nga gi-andam ang mga GKK Servant Leaders sa Ascension of the Lord Parish alang sa pagahimoon nga tinuig nga Pundok Banay Bible Rosary kon PBBR.

Gitapok ang sobra sa 200 ka mga GSL ni Fr. Zenon Ampong, kura paroko sa ALP niadtong Domingo, Septembre 15, 2019 aron nga ipasabot ang pagahimoon nga PBBR alang sa bulan sa Oktubre, ang bulan alang kang Birhen Maria sa Santos nga Rosaryo.

Gipasabot ni Fr. Ampong nga gikinahanglan ang sayo nga orientation sa mga GSL aron nga maoy mopasabot usab ngadto sa mga Tigpasayon sa Pundok Banay sa ilang tagsa-tagsa ka mga GKK.

Bisan ug dili literal nga makita ang pulong nga Rosaryo sa Bibliya, apan gipasabot ni Fr. Among nga ang matag pag-ampo sa Santos nga Rosaryo nagpadayag sa sukaranan sa pagtoong Katoliko diha sa Credo nga maoy gi-ampo usab panahon sa pagbunyag ug pagsubli sa mga panaad sa bunyag; ang Amahan Namo nga maoy gitudlo ni Hesu Kristo nga iampo ngadto sa Amahan ug mabasa sa Bibliya, ug ang matag misteryo sa Santos nga Rosaryo nga nagsaysay sa kinabuhi ni Kristo Hesus.

Gihimo matag tuig ang PBBR sa ALP pinaagi sa pag-ampo sa Santos nga Rosaryo matag adlaw sa matag pundok banay sa tibuok bulan sa Oktubre inubanan sa mga pagbasa sa Bibliya sa haom nga mga bersikulo sa matag misteryo ug sa pamalandong ug uban pang mga pag-ampo.

Tumong sa maong kalihukan mao ang pagpalig-on sa Kristohanong relasyon sa katilingban ilabina sa mga pundok banay pinaagi sa hiniusang mga pag-ampo.

Gitakdang ilusad ang PBBR ug ipadala ang mga GSL sa Septembre 29 atol sa unang Santos nga Misa sa ALP (7:00 am), Pangi ug Gravahan (5:00 am).