Mga batan-on maoy “karon” dili “ugma” sa Simbahan

Human sa pagpasalamat ni Arsobispo Romulo Valles, Arsobispo sa Davao ug Presidente sa Catholic Bishops’ Conference of the Philippines, atol sa iyang wali sa piyesta ni Sr. San Roque, Malabog, giawhag niya ang mga batan-ong dalaga ug ulitawo nga motubag sa tawag sa pagkapari o pagkamadre.

Gihagit ni Arsobispo Valles ang tanan sa pagpangumusta sa atong tawag isip Obispo o pari o ginikanan o anak kung nasubay ba kita sa pagkamakanunayon sa pagsubay sa dalan padulong sa gingharian.

Garbo ni Arsobishpo Valles nga niining Tuig sa Kabatan-onan, daghan pa kaayong mga batan-on ang nalambigit sa kalihukan sa Simbahan, sama sa mga nanganta o “choir” nga anaa atol sa maong misa. Alang niya, dili problema kondili usa ka gasa ug kalig-on sa Simbahan ang pagkadaghan sa atong kabatan-onan sa atong katilingban ug Simbahan.

Hagit gayod, matud niya, nga hatagan og dakung papel ug pagsalig ang mga batan-on diha sa Simbahan. Angayan lamang, alang kaniya, ang paghatag og importansiya sa kamakanunayon o “stability” nga maoy kasaligan kay aduna gayo’y molungtad, dunay kahangturan, dunay “forever”.