Kompirmasyon sa SMP

Adunay siento-singkwenta y dos (152) ka mga bata ang nakadawat sa sakramento sa kompirmasyon sa parokya ni Sr. San Miguel sa Panacan sa milabay nga Sabado, Septiyembre 7, 2019.

Ang halangdong Arsobispo sa Dakbayan sa Davao ug CBCP President Arsobispo Romulo G. Valles, DD mao ang naghatag sa balaang sakramento sa kompirmasyon pinaagi sa Espiritu Santo.

Ang Arsobispo nanghinaot sa mga kabataan nga nakadawat sa sakramento sa kompirmasyon mamahimo unta nga pangulo sa batan-on diha sa simbahan, sa parokya ug sa katilingban. Ug magpuyo sa yano ug talagsaon nga Kristohanong kinabuhi. Dugang pa sa Arsobispo nga ang kabataan karon mao ang atong “KARON/NOW” mao nga kinahanglan ato silang hatagan og maayong giya aron usab sila puhon ang magpadayon o magdala sa Kristohanong kinabuhi nga ipasa sa ilang mga anak.

Gibayaw sa kalipay ang mga kabataan pagkahuman sa kompirmasyon ilabina gihatagan sila og panahon nga makapapicture kauban ang Arsobispo.

Luyo sa maong selebrasyon malipayon ang PSP Ministry sa kalampusan ug hapsay nga selebrasyon sa kompirmasyon. Nagpasalamat ang PSP Coordinator Marilou Ipal sa tanang katekista sa ilang suporta ug tabang sa tanang kalihukan sa parokya ilabina sa gipahigayong kompirmasyon. (Liz Gilbuena | SMP Parish SoCCom)