Katekista nagpahigayon og team building

“Magsinabtanay, Magtinabangay ug Mag-inampoay.”

Sumala ni Br. Clifford A. Monsanto, usa ka seminarian sa Franciscan TOR, mao kini ang tulo ka hiyas nga angay mahuptan sa mga Katekista.

Sa gipahigayong team building sa grupo sa mga katekista sa parokya sa Our Lady of the Miraculous Medal, Indangan niadtong Septyembre 15, 2019, didto sa Camp Holiday resort sa Samal Island, gipa-ambit ni Monsanto ang maong mensahe.

Adunay 21 ka mga personahe ang miapil sa labing unang team building nga gihimo sa maong grupo.

Ang matag usa diha sa grupo gihatagan og higayon nga makapaambit sa iyang kaugalingong kasinatian, kalipay o kasakit, mga gusto ug dili gusto nga kinaiya pinaagi sa unang aktibidad nga “Getting to know deeper”.

Human sa pag-inambitay, adunay mga dula nga gipahigayon. Ang ulahi nga kalihukan mao ang “Building of House Dialogue”. Gibahin ang grupo sa 4 ka gagmay’ng grupo ug matag grupo adunay nagkadaiyang buluhaton ug house rule.

Ang unang grupo mao ang Open Communication rule pasabot nga pwede nila buhaton bisan unsa sa pagtukod ug paghimo sa balay. Ikaduha mao ang Open communication with restriction, kini nga grupo mahimong mag estoryahay sa pagbuhat apan aduna silay buluhaton matag usa. Ang ika-3 nga grupo mao ang grupo sa mga amang kon “mute”, molihok sila nga walay tingog. Ang ikaupat mao ang grupo sa mga buta, diin ang leader lamang sa maong grupo ang walay taptapi sa mata nga maoy mogiya sa mga kaubanan sa paghimo sa balay.

Ang materyales nga gigamit sa maong kalihukan mao ang manila paper para sa atop ug bongbong, barbecue stick para sa haligi ug rubber bond, tape ug hilo ang gamit para sa pagsumpay.

Hilabihang kalingaw sa mga PSP sa ilang gibuhat ug human sa paghimo gi-check sa facilitator ug unya gitunobtunoban.

Klase klase ang gibati sa mga katekista human sa ilang nakita apan gipasabot kini ni Monsanto nga ingon ana ang mahitabo sa grupo kung adunay usa sa grupo nga dili maayo og kinaiya.

Nahayagan ug nasabtan gayud sa grupo ang buot ipasabot sa maong kalihukan. Malipayon ug mapasalamaton ang coordinator sa mga katekista nga si Sis. Edith Mejos sa kalampusan sa kalihukan ug nanghinaut siya nga magmalahutayon ang grupo diha sa pag-alagad sa matag usa. (Anabelle Ejercito Encluna | OLMMP Soccom)