Kanhing Katekista sa Digos karon pari na sa PME

Dako ang pasalamat sa mga magtotoo sa Diocese sa Digos sa dakong grasyang ilang nadawat sa Ginoo tungod kay ang kanhing katekista nahimo na karong usa ka pari. Niadtong September 24 alas dos ang takna sa hapon, giordinahan ni Bishop Guillermo Afable, D.D si Rev. Fr. Juvanne Larriego Regidor, 43 anyos, anak nila Mr. Juan Regidor ug Mrs. Anecita Regidor. Siya nahuman pag-eskuwela sa Elementarya sa Don Mariano Marcos Elementary School, sa High School sa Digos National High School, ug sa kolehiyo sa Cor Jesu College sa kurso nga Bachelor of Science in Elementary Education (concentration in Filipino).

Nahimo siyang katekista sa Parokya sa Mary Mediatrix Cathedral ug nagtudlo sa Digos Central Elementary School ug Digos National High School (2007-2009).

Nahimo usab siyang Lay Missionary sa SME Foreign Missionary ug nadestino sa Honduras sa tuig 2011- 2014.

Nadasig siya sa mga PME Fathers sukad pa sa iyang pagkabata tungod sa ilang simple nga kinabuhi. Naabot siya sa Kenya, Africa human makadesisyon siya sa pagsulod sa seminaryo sa Quebec Foreign Mission Society (SME) diin ang pormasyon didto gipahigayon sa Kenya.

Siya giordinahan isip ika-upat nga Pilipinong pari nga PME, usa ka dako nga grasya alang sa tanan. (Leren Lonzaga | SUGID – MMC)