Unang Pista sa mga PSL kang San Juan Maria Vianney

Si San Juan Maria Vianney maoy patron sa atong mga kaparian sa mga parokya. Mao nga gipili usab siya sa mga Pangulo sa Liturhiya (PSL) sa San Miguel Parish, Panacan, Davao City tungod kay ang ilang ministriya mao man ang ubang mga buluhaton sa pari diha sa ilang tagsa-tagsa ka mga Gagmayng Kristohanong Katilingban (GKK). Busa, sa unang higayon, gisaulog sa mga PSL ang iyang kapistahan niadtong August 3, 2019 nga adunay tema: “Ang tinuod nga kinabuhi anaa diha kang Kristo.” Ang mga kalihokan sa maong kapistahan gisugdan sa pag-ampo sa Santo Rosaryo. Misunod usab ang katekismo mahitungod sa kinabuhi ni San Juan Maria Vianney nga gihatag ni Prof. Joel A. Reyes, PhD, usa ka PSL sa San Miguel Parish.

Ang Santos nga Misa gipangulohan ni Fr. Edsel Paloma, Kura Paroko sa San Miguel, Panacan. Sa iyang homiliya, iyang gipalaluman ang pagpamalandong sa Kristohanong kasinatian ni San Juan Maria Vianney kinsa tuod dili kayoo maalamon diha sa iyang teyolohiyanhong pagtoon sa seminaryo apan tungod sa iyang virtud sa pagtoo ug gugma iyang napadayag ang gugma sa Dios ngadto sa mga tawo sa Arso, Fransya taliwala sa mga kalisdanan ug pagsulay. Tungod sa iyang balaanong kinabuhi, daghan ang mga tawo sa Arso, Fransya nga buot makighimamat kaniya ilabina diha sa sakramento sa kumpisal. Busa, giawhag ni Fr. Paloma ang mga PSL nga mahimo nilang kapanaminan ang kinabuhi ni San Juan Maria Vianney isip modelo diha sa ilang pagpangalagad.

Si Bro. Felix Lastimado, ang PSL Coordinator, nanghinaut nga sa ilang pagpili kang San Juan Maria Vianney nga Patron sa mga PSL sa parokya ni San Miguel sa Panacan masmulambo pa ang ilang pagtoo ug pagpangalad diha sa ilang tagsa-tagsa ka mga Gagmayng Kristohanong Katilingban. Siya nagpasalamat sa tanan nga mga PSL sa San Miguel, Panacan nga gilangkoban sa siyam (9) ka mga sona, ingon man ang “core group” niini, sa ilang kooperasyon alang sa maong unang kasaulogan sa kapistahan sa ilang patron. Iya usab nga gipasalamatan ang ubang mga ministriya nga katambayayong diha sa ilang pagpangalagad tungod sa ilang pagsuporta sa mga PSL sa matag GKK.

Nanghinaut usab si Bro. Sergio Ayag, ang Coordinator sa PSL II, nga uban sa panabang sa maong patron St. John Marie Vianney magmadasigon ug makugihon kanunay ang mga PSL nga muapil sa pagpakalawat sa mga masakiton sa matag unang Biyernes sa bulan. Sa laing bahin, matud pa ni Bro. Bimbo Abella, Assistant PSL Coordinator, “Ang malampuson ug mabulokon nga kasaulogan sa mga PSL alang sa kapistahan sa ilang patron nga si San Juan Maria Vianney naghatag usab ug dakong higayon kanila isip “Christian bonding” sa usa’g usa uban sa ilang Kura-Paruko nga si Fr. Edsel Paloma kinsa nakig-uban gayud hangtud sa pagtapus sa mga programa.” (Joel A. Reyes)