Unang nahitabo ug nasinati sa mga batan-on sa sona 6

Ang San Roque Parish Youth Apostolate nagpahigayon og Youth Encounter sa Zone 6 kaniadtong July 27, 2019 adlawng Sabado sa GKK Sto. Niño Bal-ong Malabog, Paquibato Dist., Davao City. Ang maong panagtigom gilangkuban sa 5 ka GKKs: mao ang GKK Sto. Niño Bal-ong, GKK San Jose Beto, GKK San Roque Kialao, GKK San Miguel Meluya ug GKK Immaculada Concepcion Cabonbon inubanan sa temang “Filipino Youth in Mission: Beloved. Gifted. Empowered.”

Kining panagtigom nahimong posible pinaagi sa tabang sa mga GKK Servant Leaders sa nagkadaiyang GKK sa Sona 6, inubanan sa pagtugot sa Halangdong Kura Paroko sa San Roque Parish Malabog, Rev. Fr. Arnold Balaquinto, DCD. Tumong niining kalihokan ang pag Re-Echo sa nahitabong Summer Youth Camp niadtong May 24-26, 2019 nga nahitabo sa Parokya.

Gisugdan ang adlaw sa Praise and Worship nga gipangulohan sa mga Batan-ong Evangelizers sila Damie Sedon (PYA Vice Pres) ug Shirley Bartolome. Pagkahuman gitipak ang mga partisipante sa upat ka grupo nga gipanganlan og Team Madasigon, Team Mahigugmaon, Team Malipayon ug Team Matinabangon. Makita sa mga dagway sa mga batan-on ang ilang kalipay sa pagsalmot sa Amazing Race ug Ball Games.

Pagkahapon, gipasidunggan ang Balaang Krus ug adunay Bible Sharing sa matag grupo nga gi-facilitate sa PYA Core Group ug 2 Evangelizers nga sila Sis. Lolita Berdoa ug Sis. Josephine Berdos. Ang tema mas gipalawman sa mga Resource Speakers nga sila Ms. Lee Mecris Berdos, RSW ug Mr. Mervin B. Ceballos, Jr.

“Kinahanglan gyud diay ta magpasalamat kay gihigugma ta, gigasahan ug gipiyalan sa gahom. Dapat natong e-share sa uban kung unsa may blessings nga atong nadawat.”

“Lipay kaayo ming mga batan-on sa Zone 6 nga adunay Youth Encounter sa wala kaapil sa Summer Youth Camp tungod kay mas nafeel namo among importansya labi na katong tuig sa mga batan-on.” – Nichole Caindoy, GKK Sto. Niño PSB Pres.

“Lingaw kaayo mi sa padula bisan pag nagkalapok pero naa gihapoy teamwork. Enjoy kaayo mi!” – Juanites, GKK San Roque Kialaw PSB Pres.

“Magkatigom, magkahimamat, magkahiusa ang mga batan-on sa matag GKK.” – Nap Coquilla Pres. Participant sa Batan-on.

Gitapos ang Youth Encounter pinaagi sa Kasaulogan sa Pulong nga gidumala ni Bro. Ronald Agraviador, Zone 6 PSL Coordinator. (Lorelyn Berdos Joromat | San Roque Parish-Malabog GKK Soccom)