Sr. San Roque VV1 sa 60 ka tuig

Gisaulog sa katilingban ni Sr. San Roque, Vista Verde P1, Panacan, Davao City ang ika-60 katuig nga kapistahan niadtong Agosto 15, 2019.

Gipahigayon ang Santos nga Misa sa alas sais sa gabii nga gipangulohan sa kura paroko sa San Miguel Panacan nga si Rev. Fr. Edsel J. Paloma, DCD.

Kini ang pinakaunang GKK sakop sa parokya sa San Miguel-Panacan nga adunay special live coverage panahon sa Santos nga Misa gikan sa DXGN 89.9 Spirit FM ug Davao Catholic Herald. Ang mga anchors sila Ms. Lorie Eno ug Lilybeth Bacaron, mga GKK Soccom.

Nadasig ang katilingban sa pagpaminaw ilabina sa pagpalawom ug pagpasabot sa kinabuhi sa ilang patron atol sa homiliya.

Pagkahuman sa misa adunay pagsalu-salu didto sa kanhing kapilya nga karon mao na ang function hall.

Dakong kombera ang giandam nga gisaw-an sa mga katawhan sakop sa GKK ug ingon man sakop sa Zona 5.

Ang GKK Sr. San Roque VV1 adunay mga anak nga lima ka lain pa nga kapilya o GKK. Naandan sa maong Zona nga magtapok sila panahon nga adunay ipahigayon nga misa, sumala ni Lilibeth Ramirez ang PSK Coordinator.

Adunay gipasundayag usab nga kanta gikan sa mga GSL.

Adunay exhibition game tali sa San Roque VV1 vs. SMP Cavaliers ug nasungkit ang kadaugan sa SMP CAVALIERS sa score nga 42-53.

Mapasalamaton ang PSK nga si Cripe Maniques sa tanan nga mga GSL ug mga katilingban sa ilang suporta ug tabang sa ilang GKK.

Sumala pa ni Maniques ilang paningkamutan sa sulod sa lima ka tuig ilang mahuman ang construction sa kapilya tungod kay pangandoy sa ilang katilingban sa ika-65 nga kapistahan sa ilang patron ang Arsobispo sa Dakbayan ang mangulo sa misa.

Ang kapilya sa San Roque Vista Verde P1 usa sa pinakanindot ug malambuon nga kapilya tungod sa maayong pagdumala ni Maniques ingon man sa tanang GSL.

Ang kaanindot ug paglambo sa kapilya tungod sa ilang dakong pagsalig ug gugma sa Ginoo ug pagkamanggihatagon sa katilingban ni Sr. San Roque Vista Verde P1, Panacan. (Liz Gilbuena | SMP Parish Soccom)