PSK Team Building Gipahigayon

Malipayon ug malampusong gipahigayon ang team building sa mga Pangulo sa Katilingban (PSK) sa matag GKK nga sakop sa St. Mary of the Perpetual Rosary Parish, Buhangin, Davao City niadtong August 4, 2019. Mao Kini ang unang higayon nga napadayon ang maong activity didto sa Lanang Aplaya, Davao City diin nagsugod kini sa alas dyes sa buntag hangtod alas tres y medya sa hapon. Ang tema sa maong kalihukan: “Mapadayong Paglawig sa mga Pangulo sa Katilingban alang sa Paglambo sa tagsa-tagsa ka mga GKK ning tuig sa mga batan-on.”

Adunay programa nga gihimo nga gipangulohan ni Bing Cameros, presentation per zone, mensahe ni Brod. Diony Daro, PSK Parish Coordinator ug Brod. Elpidio Lagang, GKK Parish Coordinator.

Nagkahiusa ang mga Pangulo sa Katilingban nga mapadayon gayud kining Team Building aron makapadugang pagdasig sa matag-usa, maka-relax sa mga nagkalain-laing problema nga masinati sa Katilingban. Hayahay ang pamati ug nalingaw sa mga presentations, sayawan, kantahan, drama. Ang pinakanindot mao ang composition nga gihimo sa grupo nila Bing Cameros; mao kini ang last part, PSK – na Senior na intawon, sa pagpangalagad sige pa ug padayon, matag bulan tambong sa meeting ug pormasyon, kini buhat nga dili masayon. Mao gayud kini ang realidad nga halos mga Senior na ang nagpabiling nangalagad. Busa mao kini ang hagit sa mga sumusunod, “ang mga kabatan-onan.”

Pagkahapon adunay hamubo nga input ni Lina Montilde, parish formator mahitungod sa tema ug pagpasabot kung unsa ang dakong responsibilidad sa mga PSK as a shepherd ngadto sa katilingban, “magbalantay” o “nangulo” sa iyang panon sa padayong paglawig sa kalambuan ug kahiusahan sa tagsa-tagsa ka GKK ning tuig sa mga batan-on. Ug misunod ang hamubo nga meeting unya gitapos kini sa usa ka parlor games as a team. Pangulo sa Katilingban, gasa sa Dios. (Arsenia Barimbao | SMPRP SoCCom)