Pagtagad sa kabatan-onan sa kapistahan ni St. John Marie Vianney

“Usa sa mga tahas sa mga obispo ug ingon man mga pari mao ang pagkumpirma sa pagtoo sa mga parokyano.”

Kini ang sagad sa mga pulong sa Arsobispo sa Dabaw, Most. Rev. Romulo Valles, D.D. sa iyang homiliya dinha sa mga kapistahan sa mga parokya o GKK aron sa pagpahinumdom sa mga papel sa mga kaparian ngadto sa katawhan.

Isip kasaulogan sa kapistahan sa patron sa mga pari nga si St. John Marie Vianney, haom lamang gayod kaayo ang maong pulong ilabina nga dakong hagit sa mga kaparian sa simbahan karon ang makanunayong pagtisok sa hunahuna sa mga magtutuo sa pagkinabuhi sama kang Kristo.

Ang kapistahan ni St. John Marie Vianney karong Agosto 4, 2019. Nadesisyonan sa mga kaparian sa Artsidiyosesis nga ipahigayon ang panagtigom ug kalihokan sa mga kaparian liwas niini.

Kada tuig, adunay mga aktibidad aron nga makigduyog sa mga lain-lain nga mga sektor sa sosyidad. Sa milabayng tuig, ang mga benepisyaryo mao ang mga tigulang nga naa sa dangpanan sa Missionaries of Charity sa Agdao.

Alang karong tuiga, isip Tuig sa Kabatan-onan napili sa mga kaparian nga makig kulukabildo ngadto sa Regional Rehabilitation Center for the Youth (RRCY) sa Tugbok ning dakbayan.

“Subay sa tema karong tuiga mao sa year of the youth isip pagpangandam sulod sa siyam ka tuig sa ika-500 ka tuig sa pag-abot sa Kristiyanismo sa nasud, napili ang mga Children in Conflict with the Law kon CICL diha sa RRCY,” pamahayag ni Rev. Fr. Ritsche Gamaya nga director sa Archdiocesan Commission on Social Communications.

“Buot namong ipaabot ngadto sa mga kabataan nga kanhing nahisalaag nga aduna pa silay dakong paglaum sa katilingban bisan pa man sa mga sala nga ilang kanhing nabuhat. Bisan sa ilang kahuyang, dunay dakong paglaom, ug ang Ginoo nagmahal kanila,” dugang niya.

Idungan usab ang ordinasyon sa pagkapari ni Rev. Ramon Jamora nga ipahigayon sa St. Francis of Assisi Parish sa La Verna sa maong adlaw sa buntag.

Aduna usab gitakda nga salu-salo ug mga friendly games nga ipahigayon sa Immaculate Conception Parish sa Mintal isip pagdumdum sa handumanan ni St. John Marie Vianney nga patron sa kaparian.

Lauman nga pangulohan ni Abp. Valles ang Santos nga Misa sa Immaculate Conception Parish.