Mga ministriya, muhalad og Misa

Matag ministriya sa parokya sa San Miguel-Panacan gitahasan na sa paghalad og Santos nga Misa.

Niadtong Agosto 10, 2019, ang Pangulo sa Katilingban (PSK) mao ang labing una nga ministriya nga nagpahigayon og Santos nga Misa nga gipangulohan sa kura paroko, Fr. Edsel Paloma.

Gisugdan ang misa sa alas dies sa buntag sa Seminar Hall 2 nga gitambongan sa tanang PSK sakop sa parokya ug ingon man adunay mga pipila ka mga parokyano ang mitambong sa maong misa.

Sa homiliya ni Fr. Edsel siya naghisgot nga ang mga PSK mao ang tinuod nga bahandi tungod sa ilang paghalad sa ilang kinabuhi alang sa pagserbisyo diha sa ilang katilingban.

Gihagit sa kura paroko ang mga PSK sa pagpili og usa ka lider aron magtudlo sa husto nga pamatasan sa panahon sa misa ilabina sa pagpangalawat.

Kini subay sa pagpahinumdom sa Arsobispo Romulo Valles nga tudluan ang mga tawo sa pagluhod ug sa hustong pagpangalawat sama sa ipatong ang tuong kamot aron sa pagdawat sa hustiyas ug magbow o muyuko kini pagkahuman sa pagkalawat. Inig balik sa lingkuranan moluhod kini ug maghalad og pag-ampo.

Pagkahuman sa misa adunay open forum diin gitubag sa kura paroko ang bisan unsang mga pangutana o concern mahitungod sa ilang pagserbisyo sa tagsa-tagsa nilang katilingban.

Gipaila-ila usab ang bag-ong Pastoral nga si Melard Libre aron kung aduna may mga panginahanglanon moduol lang kini kaniya tungod kay siya ang kaabag sa kura paroko.

Malipayon nga nagpasalamat ang PSK Coordinator Lilibeth Lumontod Ramirez sa tanang mga PSK members sa ilang pagtambong. (Maria Leizl Gilbuena | SMP SoCCom)