Gugma ug kaaghop: Ika-59 nga kapistahan ni San Ignacio de Loyola sa Monkayo

Ang pagkinabuhi nga mahigugmaon ug maaghop ang nahimong sentro sa ika-59 nga kapistahan sa parokya sa San Ignacio de Loyola sa Monkayo sa probinsiya sa Compostela Valley nga gisaulog niadtong Hulyo 31, 2019.

Gitataw ni Most Rev. Medil Aseo, D.D., Obispo sa Dayosis sa Tagum, ang tinuod nga pagkamaalagaron nagsubay sa maong mga mithi.

“Gipili nato ang tema nga nag-ingon nga ‘Kinabuhing maalagaron puno sa gugma ug kaaghop’. Di man siguro kita mahimong makaalagad ug walay gugma ug kung kita dili maaghop,” sumala niya.

“Nindot kini nga tema. Ang atong pagalagad kinahanglan nga nagsubay kini sa atong panglantaw nga unahon ang laing tao ug dili atong kaugalingon. Apan mahimo lamang kana kung kita adunay gugma. Sumala pa, love is the greatest power that there is,” dugang ni Bishop Aseo.

Gitataw usab niya ang kalig-on sa maong parokya human sa pipila ka tuig.

“Sa dakong kalipay, atong gisaulog ang kapistahan sa atong patron! Sa ika-59 nga kapistahan, atong napamatud-an nga usa kini sa mga pinakakaraan nga simbahan,” iyang pamahayag.