Ang Kasaulogan sa Eid al-Adha ug si Birheng Maria

Ang Eid al-Adha usa sa mga mahinungdanon nga kasaulugan sa atong mga kaigsoonang Muslim dili lamang dinhi sa Pilipinas apan sa tibuok kalibutan. Kini saulogon human sa bulan sa Ramadhan. Kini gitawag pud og “Kapistahan sa Pagsakripisyo” (Feast of Sacrifice) agig paghinumdom sa pagsakripisyo ni Ibrahim (Abraham) sa iyang anak na si Ismail ug mao usab kini ang kasaulogan agig pagtapos sa matagtuig na panaw-duaw (pilgrimage) sa usa ka Muslim ngadto sa Mecca, ang lugar na balaan kaayo alang kanila kay didto gituohan na si Ibrahim gisugo sa Dios sa pagtukod sa Kaaba.

Kani nga mahinungdanon na kapistahan sa atong mga kaigsonang Muslim, dili layo ug lahi para kanatong mga Kristiyano ug mga kaigsoonan natong mga Hudyo (Jews). Kita tanan, miila kang Ibrahim na atong “Amahan sa Pagtoo” ug mao pud na maingon nato na ang mga Muslim ug Hudyo atong mga “Igsoon sa Pagtoo” (Abrahamic Faith/Religion).

Ang pagtuman sa kabubut-on sa Dios ni Ibrahim sa paghalad o pagsakripisyo sa iyang anak na si Ismail dili gayud lalim. Apan sa Tradisyon sa Islam si Ibrahim ug Ismail pareho nga miuyon sa sugo sa Dios sa pagsakripisyo. Apan taliwala sa kalisud, misalig si Ibrahim ug si Ismail ngadto sa Dios. Kabahin sa istorya mao pud ang pagkundina sa tradisyon kadtong mga panahuna sa paghalad sa tawo (human sacrifice) ug sumala sa istorya ang Dios mihatag og lalaking karnero agig puli nga isakripisyo. [Surah Al Saffat 37:100-113].

Mangutana kita, “unsa man ang kalambigitan niini ni Birheng Maria?” Si Maria, alang sa mga Muslim, giila nga si Miriam ug inahan ni Propeta Isa (Hesus). Sama ni Ibrahim, si Maria, ang iyang istorya aduna pud kalabutan sa anak. Wala siya giingnan sa angel na ihalad o isakripisyo ang iyang anak na si Hesus. Gitawag siya sa paghalad sa iyang kaugalingon aron mamahimong inahan ni Hesus. Sama ni Ibrahim, dili pud lalim ang iyang nadawat na mensahe gikan sa Dios. Kung hunahunaon nato, pwede kaayo na mapaulawan siya sa kadagadhanan apan nakita nato ang iyang dakong pagsalig ug pagtuman sa kabubut-on sa Dios.

Kitang tanan, Muslim man o Kristiyano, karong bulan sa Agosto agig pagsaulog nato sa Eid al-Adha (Aug. 11 o 12, 2019) ug Pagkayab ni Maria ngadto sa Langit (Aug. 15, 2019) nagpahinumdom kanato na adunay mga butang ug mga panghitabo sa atuang kinabuhi na usahay lisud masabtan o matugkad apan gitawag kita nga padayun sa pagsalig ug pagtuman sa kabubut-on sa Dios. (Lunar Tan Fayloga)