Ang ika-68 nga kapistahan sa GKK San Roque sa Cogon, Toril

Napuno og kalipay sa pagsaulog sa abunda nga kasaysayan ang ika-68 ka tuig nga kapistahan ni Sr. San Roque sa Cogon, Toril, sakop sa parokya sa Sto. Rosario sa Toril, niadtong Agosto 17 ning tuig kasamtangan.

Ang nagsaulog sa Santos nga Misa alang sa maong selebrasyon, usa ka anak sa maong katilingban, Fr. Ritsche Gamaya.

“Malipayon kaayo ko nga makakita sa mga dagway sa kaniadtong mga silingan ug kauban nako dinhi ug karon namauli gyud alang sa pyesta,” tataw niya sa iyang homiliya.

“Malipay kita makakita og mga miyembro gyud niining maong GKK sa ika-68 ka tuig niini,” dugang sa maong pari.

Ang ika-68 nga kapistahan sa maong parokya nagtuyok sa temang “Sr. San Roque mapailubon ug mainampoon, sumbanan sa katilingban nga gipangga ug gigasahan, tabangi kami padulong sa dalan sa Gingharian.”

Nasulod usab diri ang tema sa tuig sa kabatan-onan nga nag-ingon, Filipino Youth in Mission: Beloved, Gifted, Empowered nga kung hubaron sa kaugalingong pinulungan: gipangga, gigasahan, ug gigamhan.

“Nindot gayud nga aktibo atong mga kabatan-onan nga nangulo sa atong mga kalingawan,” pamahayag ni Fr. Gamaya.

Tipik usab sa iyang mensahe, kinahanglan nga mas mahimong abli ang mga hamtong sa pagpaminaw ug pagdawat sa mga kabatan-onan.

“Usahay ang mga hamtong magreklamo nga gahi naman og ulo ang mga batan-on pero ang mga batan-on, muingon pod nga moapil man unta mi pero kasab-an ra man mi kay sabaan kuno mi,” tataw niya.

Gipaabot usab ni Fr. Gamaya ang mensahe sa Ginoong nagkanayon, “Paaria Kanako ang mga bata kay sa mga sama kanila, naa ang Gingharian.”