PSK, PSA ug SoCCom pormasyon nakapamalandong sa 3 ka ministriya

Hilom kaayo ang tanan nga namati sa gipaambit sa usa ka PSK ug maestro pa gyod sa Malabog National High School nga si sir Dennis Dela Luz mahitungod sa “PAGPANGALAGAD”. Ingles ang topiko apan han-ay kini nga gipasabot sa mga pangulo sa San Roque Parish Malabog.

Tuod man, hasta ang among kura paroko nga si Rev. Fr. Arnold Balaquinto nalipay niini kay na refresh pud siya sa iyang pagka-Seminarian kaniadto. Daghan nakapamalandong sa maong mga mensahe. Nahitabo kini niadtong Hulyo 3, 2019 sa alas 8 sa buntag hangtod alas 12 sa udto dinhi sa San Roque Parish, Malabog.

Ang pangutana, nganong nangalagad man kita?

Mao ni ang gibilin ni Kristo sa atoa nga “Sundon ang iyang mga Lakang…”

Matod pa ni Sir Dennis, diha sa atong bunyag nakaambit kita sa 3 ka misyon ni Kristo: Pagka-hari, Pagkapari ug Pagkapropeta. Kini gipun-an pa ni Fr. Arnold para mas kompleto rekado ang tanan. Matod pa niya, being a leader we must be like Pope Francis, Servant of all servants.

Dungag niya, nga aron mas maepektibo kini, kinahanglan ang saktong tulog, saktong kaon ug saktong ehersisyo.

Nagpaambit usab ang matag ministriya sa Soccom, PSK ug PSA sa ilang nasabtan ug napamalandongan. Matod pa ni Bro. Regidor, PSK sa GKK Sto. Niño Balagbag sona 11, una, dako gyod ang natabang kaniya sa pagpaminaw sa maong topiko.

Tungod sa 12 niya ka-tuig sa pagpangalagad sa simbahan, GKK ug apil na iyang pamilya, dako gyod ang iyang kakulangan ug daghang sablay ug maningkamot siya nga makapangalagad pa siya sa ilang kapilya, pamilya ug simbahan nga sama kang Kristo. Ug matul-id pa niya ang mga sablay nga nahiatabo sa iyang pagpangalagad isip PSK ug makadasig sa uban nga moapil sa kalihokan sa GKK. (Imelda Overiz)