Pag-ampo kanunay

Ika-17 nga Domingo sa Ordinaryong Panahon
Gn 18:20-32 / Ps 138:1-2, 2-3, 6-7, 7-8 / Col 2:12-14 / Lk 11: 1-13

Atong nadungog sa atong ebanghelyo karon na gitudloan ni Hesus ang iyang mga tinun-an unsaon pag-ampo. Gihatag ni Hesus ang Amahan namo. Diin kani na pag-ampo nagtudlo kanila na kung moampo kinahanglan na mag-una sa pagdayeg ug pasalamat sa Ginoo. Human, pangayuon ang pagbuot sa Ginoo na unta matuman diha kanila. Ngano man? Kay ang pagbuot sa Ginoo maoy unang makapalipay sa tao. Mosunod dayon ang pagpangayo ug pasaylo sa Ginoo. Apan kinahanglan hinumdoman na ang pagpangayo ug pasaylo kay dapat ubanan ug pagpasaylo ngadto sa uban. Nakapait lang sa kulturang hudeo, ang paghatag ug pasaylo kay medyo dili kaayo duot. Kay ilahang kultura kay “mata sa mata, ngipon sa ngipon” pasabot, kinsa kadtong nakasala dapat bayaran gayod. Walay uso ang palampason lang usa or pasayluon nalang. Medyo bag-o kini sa kultura sa mga tinun-an ni Hesus. Lisud sa ilaha apan dili imposible. Sa katapusan, pangayuon ang pangamuyo na dili itugyan sa panulay ug luwason sa dautan.

Human mahatag ni Hesus ang Amahan namo, kay iyahang gihatagan ug sambingay ang iyang mga tinun-an diin nagaduso sa panglantaw na kinahanglan na ang tao mag-ampo na walay puas o Molahutay sa pag-ampo. Bisan usahay murag wala gipaminaw sa Ginoo pero kinahanglan magpadayon gihapon sa pagampo. Ngano man? Kay ang Ginoo never gayod nga motalikod sa iyang mga hinigugma. Usahay lang, tistingan ang tawo aron mas molambo ang pagtuo.

Unsaa may mensahe ani para sa ato? Simple lang, gitawag kita karon na molahutay sa pag-ampo. Mag-ampo gayod kita matag karon ug unya. Ngano man? Kay tungod sa pag-ampo, atong ginapaningkamotan na kita maduol diha sa Ginoo. Bisan usahay wala nay lami iampo gud tungod sa problema ug kalisud, usahay murag wala na naminaw ang Ginoo, padayon ghapon sa pagampo. Kay gipahinumdoman kita karon na ang Ginoo dili ug dili gayod mobiya sa iyang mga gihigugma. Ang Ginoo dili gayod motalikod kanato. Timan-i, gipakatayan gani ka niya, talikdan hinuon ka niya? Dili ug dili gayod. Busa padayon sa pag-ampo ug pasalig sa iyaha. (Rev. Marvin Del Campo)