Asa gikan ang Kaalam?

Ika-16 nga Domingo sa Ordinaryong Panahon
Gn 18:1-10 / Ps 15:2-3, 3-4, 5 / Col 1:24-28 / Lk 10:38-42

Ania ang Ebanghelyo nga magtudlo kanato sa kaalam. Adunay usa ka karaang istorya mahitungod sa usa ka mangialamon. Miingon kono ang Dios kaniya nga “hatagan ko ikaw ug million ka tuig ning kalibutan. Unsa man, pila ka tuig ang imong gustong mabuhi ning kalibutan? Sa walay pag-ukon-ukon, mitubag ang manggialamon: “Mga Otsenta, igo na kanako” Misagbat ang iyang mga disipolo. “Apan Maestro, kon moabot ka’g million ka tuig daghan ang makatuon sa imong kaalam. Mitubag ang manggialamon: “kon madugay ako dinhi sa kalibutan, magpadayon ang mga tawo sa pagpataas sa ilang kinabuhi kaysa pagpalungtad sa ilang kaalam.” Tinuuod ba kini? Sa atong panahon karon ang katawhan buot gayud nga molungtad pa ang ilang kinabuhi, sama pagpabata, paggamit sa mga kemikal nga mobata ang nawong. Unsa man ang hinungdan? Seguro, gibuhat nila kini, tungod lamang sa kuwarta… nagpadayon sa pagpangandoy, pangambisyon, ug pagpaningkamot, nga modaghan ang kuwarta. Apan ang kuwarta dili kanila makahatag sa kaalam. Ang kaalam ug ang matuod nga kaalam naggikan ra gayud sa atong Ginoong Jesus. Busa ning atong Ebanghelyo si Maria, nga naminaw kang Jesus ang nakapili sa matuod nga kaalam.

Wala kondenaha ni Jesus si Martha sa iyang mahigugmaong pag-alagad; nagpahinumdom si Jesus kaniya ug sa tanang tawo nga kita mabuhi dili lamang sa tinapay kondili sa Pulong sa Dios. Si Martha man gud nagkapuliki sa pagpangandam sa pagkaon alang sa tanan, inubanan sa iyang pagpahimangno sa iyang igsoon nga kinahanglan motabang usab siya. Usahay baya, grabe ang atong ka-busy, busa man gani makalimut kita sa pagpaminaw sa Pulong sa Dios. Ilabina kon ang atong mahinungdanong negosyo, milambo na.

Aduna koy nabasahang istorya, nga naghisgot sa duha ka babaye nga naghimo og pilgrimage didto sa Lourdes. Sa pagsugod sa ilang pag pilgrimage, miingon sila nga moadto sila sa Lourdes, aron idalit nila ang ilang pangandoy, mga damgo ug mga gipas-ang mga mabug-at nga mga problema sa Mahal nga Birhen. Pag-abot nila didto: Si Minda ang interesado kayo sa mga maanindot nga mga views, maanindot nga mga alahas ug mga souvenirs, ug ang iyang panahon, nahurot na lang sa paglibot-libot, busa wala na siyay panahon sa pag-adto sa Grotto aron sa pag-ampo ug pagtuman sa iyang plano. Gikapoy kayo siya busa mibalik na siya sa hotel, apan nakalimtan niya ang mga cards nga buot niyang paliton. Pagbalik sa hotel, nakapanguros lamang siya ug natumba na sa kakapoy. Samtang si Belen, sa ilang pag-abot, natulog una, nagpa presko sa kaugalingon, aron andam sa pagbisita sa Grotto. Didto sa Grotto, siya naka-ampo nga malinawon kaayo ug nasulti niya sa Mahal nga Birhen ang tanang plano ug pangandoy. Sa iyang pagbalik gikan sa Grotto, nakakita siya sa mga nanindahay nga mga souvenir shops, cards ug uban pa. Namalit siya unya mibalik sa hotel nga gaan kayo ang gibati. Kinsa kanila ang migamit sa iyang kaalam? (Sr. Rica Dalaguit, FsP)

(Excerpts taken from “His Word Lives” by Vima Dasan, SJ)