171st San Pedro Cathedral Fiesta

39th Anniversary of the Dedication of San Pedro Cathedral

Niadtong Mayo 17, 2019, agig pagpangandam, pag-abli ug pagpasidungog sa ika 171st nga kapistahan ni Sr. San Pedro, adunay (31) ka gabii nga panaw-duaw uban sa mga GSL ug membro sa nagkalainlaing katilingban, adunay Santos nga Misa ang matag kapilya nga maadtuan sa imahe ni Sr. San Pedro. Adunay katekismo ang Formation Ministry uban sa mga GKK Formator, ug usa ka testimonya sa mga kabatan-onan nga sakop sa Parish Youth Apostolate.

Nakapadasig ang mga nagkadaiyang kasinatian sa atong mga kabatan-onan, sa ilang linghod nga pangidaron, naagian or na-encounter na nila ang mga pagsulay ug kalisod diha sa pagpangalagd ug sa ilang pamilya, apan kining tanan maoy nakahatag kanila sa kusog, nga sila molahutay sa pagpangalagad ug pagpakabuhi.

Nalipay ang among mga kaparian nga naminaw sa mga kabatan-onan, nga sila gihatagan og panahon nga makit-an ug madungog ang ilang mga kahuyang. Ang tema karong kapistahan sa atong parokya, gipahaum sa Tuig sa mga Kabatan-onan: “Dinasig ug Ginasahan, Giyahan Nato ang mga Kabataan sa Pagpangisda og Katawhan, si San Pedro Atong Panig-ingnan”.

Hunyo 21, 2019 – nanawagan ang simbahan sa usa ka katilingbanong kasalan ug gitubag kini sa (28) ka magtiayon, nadawat nila ang sakramento sa kasal, bitbit ang uban nilang kabataan sa ilang kahiusahan atubangan sa Ginoo.

Hunyo 22, 2019 – gipahitabo usab ang Socio Cultural Night nga gihatagan og tema sa mga batan-on, MinDanaone: Unity in Diversity dinhi sa San Pedro Cathedral Auditorium. Kini giapilan sa mga nagkalain-laing lumilihok, Ministriya ug Sona sa GKK. Gitambungan kini sa mahal nga Arsobispo sa Dabaw nga si Abp. Romulo G. Valles, D.D. Nakita namo nga nalingaw siya tungod sa kamabulokon sa mga costume sa nagkalainlaing tribo sa Mindanaw nga ilang girepresentar.

Hunyo 28, 2019 – alas 3:00 sa hapon, adunay prosesyon ang (31) ka mga kapilya, ang mga imahe sa patron, gisakay sa trisikad ug gidayandayanan kini sa mga nindot nga mga bulak ug balloons, magsunod ang mga GSL ug membro sa GKK nga nahisakop sa maong parokya.

Human sa prosesyon nagsunod ang Santos nga Misa alang sa kasaulugan sa “ika 39th Anibersaryo sa Pagpahinungod sa San Pedro Cathedral”, pagasindihan ang kandila sa (12) ka piniling pamilya nga nagsimbolo sa mga haligi sa parokya.

Hunyo 29, 2019 – Pontifical mass nga gipangulohan ni Abp. Romulo G. Valles, D.D., Archbishop of the Metropolitan Archdiocese of Davao and CBCP President, pagasundan kini ug mass baptism. Ang pagpanghatag og food packs gipadayon kini alang sa mga parokyano. (Rosalinda C Jabonillo | SPCP SoCCom)