Sunod kanako

Ika-13 nga Domingo sa Ordinaryong Panahon
1 Hari 19:16b, 19-21 / Sal. 16:1-2, 5, 7-8, 9-10, 11 / Gal. 5:1, 13-18 / Lk. 9:51-62

Daghang mga butang o panghitabo karon nga ginasundan bisag wala kita giagni nga mosunod. Usahay dili ta makabantay nga nagsunod-sunod na diay kita nga wala kita kamalay nga maglisod na ta og hunong kanus-a dili ta mosunod kanila. Pananglit, daghan nagsunod-sunod sa mga teleserye nga dili na ta makahimo usahay sa mga importanteng butang kay unahon gyud nato ang maong mga teleserye sama sa Probinsiyano ug The General’s Daughter. Usahay maningkamot pod tag sunod sa FB o kaha sa twitter o kaha sa kinsay nidaog sa dula o sugal.

Karong Dominggoha sa atong Ebanghelyo, gipahimangnuan kita nga andam unta kitang mobiya sa bisan unsay makababag kanato sa tiunay nga pagsunod kang Kristo. Mao kini ang iyang hagit sa mga tawo nga mipadayag nga mosunod kaniya. Gihagit niya nga biyaan ang mga patay, nga ang dili sama sa langgam nga adunay salag ang Anak sa Tawo walay kapahulayan, ug nga dili angay mahinungon kita sa mahal sa kinabuhi.

Mao kini ang hagit usab ngadto kang Elias sa ubang pagbasa ug ni San Pablo ngadto sa mga taga-Galacia. Gipalingkawas na kita sa Ginoo pinaagi sa iyang pagpakasakit sa tanang kaulipnan sa sala. Niining paagiha, kita dunay katakos sa pagsanong ug pagtuman sa maayo ug pagsalikway sa dautan. Kinahanglang kitang mopili ug modesisyon alang sa Ginoo aron atong masunod ang lakang ni Kristo. Dili unta kita mahaylo sa unsay sayon, sa naandan, sa kaharuhay apan modawat nga taliwala sa palas-anon isip tinun-an ni Kristo, maangkon nato ang tinuod nga kalinaw ug kalipay sa kasing-kasing kung itahan nato ang atong kinabuhi sa tawag sa Ginoo.

Unsa kaha ang nakapalangan kanato sa pagtubag sa iyang tawag? Duna bay mga butang, relasyon o hitabo sa atong kinabuhi nga nakapugong kanato sa tininuod nga pagsunod kang Kristo?