Summer Youth Camp sa Parokya sa San Miguel hapsay ug malampuson

Gipahigayon ang tulo ka adlaw nga Summer Youth Camp 2019 (SYC) sa parokya sa San Miguel, Panacan, Mayo 24-26.

Ang SYC tinuig nga dakong kalihukan sa parokya aron sa paghatag kahigayonan alang sa mga kabataan ug mga kabatan-onan nga makatagamtam sa mga bag-o ug mahagiton nga mga kalihokan nga nagpasiugda sa responsable nga kinaiya ug pagpalambo sa mga kahanas sa kinabuhi nga Kristohanon. Tuyo usab ang pagtabang sa mga kabataan ug kabatan-onan nga mamahimong aktibo nga mga miyembro sa parokya.

Sumala pa ni Ham Hilbert Anub, PSB gikan sa GKK San Isidro Labrador-Pizaro, mikabat sa kuatro sientos ka mga delegado ang misalmot gikan sa nagkadaiyang mga batan-on sakop sa parokya nga gilangkuban gikan sa mga Campers, Knights of the Altars ug mga PSB.

Giablihan ang unang adlaw, Mayo 24, pinaagi sa Santos nga Misa nga gipangunahan ni Fr. Armand Bacalso. Gisundan kini sa usa ka parada sa mga batan-on.

Puno sa mga kalihukan ang tulo ka adlaw sama sa Laro ng Lahi, Ginoo at Binibining Katoliko 2019, Commitment Knots, diin ang mga kabatan-onan nagsulat sa ilang mga saad nga angay bag-ohon ug angay buhaton gikan sa ilang nakat-unan sa SYC.

Adunay mga Talk aron sa pagpasabot ug pagdasig sa mga batan-on sa ilang pagka BELOVED, GIFTED ug EMPOWERED.

“Bisan kinsa pa ka… Hinumdumi, Pinalangga ka Niya (Ginoo).”
– Alvin Olaer, Beloved resource speaker

“Your talent is God’s gift to you. What you do with it is your gift back to God.”
– Bro. Rusty Salazar Corsame, GIFTED resource speaker

“You were made to do great things. Be EMPOWERED by living the FAITH.”
– Warren Rex Bautista, Empowered guest speaker.

Aduna usab usa ka lamesa nga adunay nagkalain-laing klase nga mga Bibliya gikan sa nagkadaiyang relihiyon. Ug adunay duha ka mga batan-on gikan sa PSB Keith Obongen ug Joshua Ocedo nga andam muhatag sa tubag sa bisan unsang pangutana mahitungod sa relihiyon.

Panahon sa tulo ka adlaw’ng SYC makita usab ang mga personahe sa mga kapulisan gikan sa Sasa, Police Station aron sa pagbantay sa kalinaw ug seguridad sa mga batan-on. Aduna usab stanby PDART o Parish Disaster Action Response Team nga mga batan-on gikan sa St. Mary Parish-Buhangin ug sa San Pablo Parish, Knights of Columbus ug Barangay Police. Higpit ang seguridad sa parokya tungod sa maong kalihukan.

Ang among kura paruko nga si Fr. Edsel Paloma mapasalamaton sa tanang kabatan-onan nga misalmot sa gipahigayon nga Parochial Summer Youth Camp 2019. Ilabina sa mga ginikanan sa mga kabatan-onan ug ingon man ang tanang GKK nga misuporta sa mga panginahanlanon sa mga batan-on panahon sa SYC 2019.

Gipanguluhan sa PSB Coordinator Rondis Saulda, inubanan sa Youth adviser Waren ug Cristine Bautista ang gipahigayon nga SYC 2019 nagmalampuson gayud.(Liz Gilbuena | SMP Parish SoCCom)