Santisima Trinidad

Holy Trinity Sunday
Proverbs 8:22-31 / Psalms 8:4-5, 6-7, 8-9 / Romans 5:1-5 / John 16:12-15

Ang pamilya ni Karl ug ni Mayan, nagkahiusang mitambong sa usa ka asembleya sa mga pamilya. Ilang giuban ang ilang lima ka mga anak diin ang kinamagulangang lalaki, nagpanuigon og 18, gisundan sa babaye, 15, ang sunod 12, ang sunod lalaki, 10, ug ang kamanghuran nga babaye, 3 pa lamang. Sila ang nahimong bisitang moawit sa tema sa gipasiugdang asembleya sa mga Pamilya. Masigabong palakpak ang ilang nadawat gikan sa bagang katawhan nga mitambong sa maong panagtigom, tungod sa ilang maanindot nga pag-awit. Matud pa sa usa ka lalaki nga mitambong: “Almost perfect and voicing”. Sa ilang paghatag sa pasiunang pakigpulong sa wala pa sila mokanta, miingon si Karl, nga tungod sa awit, nagkahiusa silang buot mopasundayag sa ilang mga talento alang sa kaayuhan ug tumong sa kahiusahan sa pamilya. Sila mismo nakasinati kon unsa ang pagkahiusa sa tibuok pamilya. Matud pa sa Amahan, gipaningkamotan nilang sundon ang mga gisulti ni San Pablo diha sa sulat ngadto sa Korinto nga naghisgot sa gugma. (1 Cor. 13:1-13) ang gugma mapaubsanon; ang gugma… Unsa man kini sila: “Ang gugma Kon mabansay diay kana nga mga pulong, segurado gayud nga magkahiusa ang pamilya, luyo sa daghang usab nga mga kahuyang nga ilang nasinati.”

Sa atong pagsaulog sa Domingo sa Santisima Trinidad, ang Amahan, ang Anak ug ang Espiritu Santo, tulo ka persona sa Usa ka Dios, nag-awhag kanato sa pagtuo nga silang tulo adunay hingpit nga pag-inambitay, adunay hingpit nga paghigugmaay, ug hingpit nga komunidad. Ang Simbahan sa pagkatinuod usa ka ejemplo sa pagpadayag niining kahiusahan alang sa katawhan sa kalibutan, pagpadayag sa hingpit nga katilingban sa katawhan sulod sa Trinidad. Ang hingpit nga larawan sa kahiusahan mao ang Kahiusahan sa Tulo ka Persona sa Usa ka Dios. Ngano man Tungod kay matud pa sa atong Katesismo, ang Amahan mao ang Magbubuhat sa kalibutan, unya ang Anak mao ang Manluluwas sa kalibutan, ug ang Espiritu Santo mao ang maglalamdag nga siya usab ang nagpadayon sa buhat sa Manluluwas sa paggiya og pag-amuma sa katawhan. Ang matag usa adunay buluhaton apan nagkahiusa. Kitang tanan adunay pagka-talagsaon, apan wala kini magpasabot nga magkatibulaag kita, kay kita usa ra kang Cristo. Sa diha nga kita gibunyagan, nahiusa kita sa katilingban nga adunay pagtuo, nahiusa kita kang Cristo. Busa giimbita kita sa pagtagad sa atong pagka-talagsaon, aron pauswagon ug palamboon ang atong mga gasa, alang sa kaayuhan dili lamang sa atong kaugalingon kondili alang sa tanan. Ang gihisgotan ni Karl sa sinugdanan sa atong pamalandong, nga ang gugma ang hinungdan nga nagkahiusa sila, bisan silang tanan adunay mga sayop ug kahuyang ug labaw sa tanan adunay pagka-talagsaon. Sa laing pagkasulti, mahimo diay kanatong mga tawo nga mahisama sa kahiusahan sa tulo ka Persona sa usa ka Dios. Tinuod lisod kini natong sabton apan, masinati nato kini sa atong kinabuhi, sama ra nga nasinati nila ni Karl ug ni Mayan ang kahiusahan sa ilang pamilya.