Prutas daghan atol sa Kadayawan

Duha na lamang ka bulan, saulugon na sab sa Dakbayan sa Davao ang tinuig nga Kadayawan Festival sa matag buwan sa Agosto, isip pag-ila usab sa atong mga kaigsuonang mga Lumad nga ania dinhi sa syudad, ilabina nga aduna silay dakong papel sa paglambo sa Dakbayan.

Tungod sa daghang mga aktibidad nga ipahigayon dugukon kini sa bagang duot sa mga turista lokal man o internasyonal kinsa nga tumong nga mulaag ingon man motilaw sa nagkadaiyang prutas sa syudad, ilabina nga nabaniog kini nga Fruit Basket of the Philippines.

Gipaniguro ni Bienvenido Pugoy, Assistant Officer In Charge sa City Agriculture Office nga adunay mga makaon ug madala nga prutas ang mga bisita sa maong okasyon.

Sumala ni Pugoy nga namatikdan niining panahona nga ang Durian namulak na busa gilauman nga sa umaabot nga buwan sa Agosto sakto nga ma-harvest na kini.

Anaa na sab sumala pa ang lanzones ug uban pang prutas. “Gi-awhag na ang Council sa Durian, Mangga ug uban pang prutas nga pakusgan ang pagpabunga aron dili ma kuwang sa Kadayawan,” dugang ni Pugoy.

Samtang ang pamahayag ni Pugoy giuyunan kini sa fruit vendor nga si Josan Pungyan nga anaa ang tindahan sa prutas gawas sa Magsaysay Park nga niining panahona anaa sa 200 ang kilo sa prutas, apan lauman nga moabot na lamang kini sa 40 pesos matag kilo sa Agosto tungod modagsang ang prutas sa maong okasyon. “Minus ray 500 ka durian ang halinon sa Kadayawan matag adlaw, dili nami manawag ana tungod ang katawhan nay moduol, pero daghan man og prutas, mobarato gyud na,” sigun ni Pungyan.