Pagbalik sa Santa Cruzan sa Parokya sa Sagrada Pamilya

Human sa lima ka tuig, nagpahigayon og Santa Cruzan ang Parokya sa Sagrada Pamilya sa Brgy. Baliok. Gihimo ang koronasyon sa Reyna Elena 2019 ug sa mga kaubanang rayna niadtong hapon sa Mayo 31 sa Calasanz Acaedemy of Davao Gym nga anaa nahimutang atbang lamang sa parokya.

Sa wala pa nagsugod ang programa alang sa koronasyon, usa ka malipayong parade (motorcade) ang gihimo sa nag-unang kadalanan nga nahisakop sa parokya. Nakakuha og atensyon ang maong parada tungod sa mga kandidata, inubanan sa ilang konsorte nga gikasay sa nagkalain-laing float nga giadornuhan og mga anindot nga bulak.

Gisunod gilayon ang processional march sa tanang mga kandidata nga nagrepresentar sa ilang GKK. Tungod sa kadaghan sa nisalmot sa Santa Cruzan, pito lamang kanila ang gitauran og sash atol sa programa ug tulo ka rayna ang gikoronahan.

Si Marivic Ecabande, Assistant Parish FiCom Coordinator maoy nagkorona sa Reyna Elena 2019 saglit siya man ang gikoronahan niadtong tuig 2014. Siya inubanan ni Mr. Jose Tiu, Vice-Chair sa Parish Finance Council.

Sa maong okasyon, nakapaambit sa ilang talento ang pipila ka mga kabataan ug kabatan-onan sa gipasundayag nga intermission numbers. Nakapahigmata usab sa mga nanambong ang mensahe ni Mr. Rey Ian Sarroza sa pagbalik lantaw sa tradisyon sa Santa Cruzan nga mamahimong dili na mailhan sa umaabot nga henerasyon kung walay magpadayon niini.

Matod ni Emily Dela Torre, GKK Committee Coordinator, ang malampusong pagpahigayon sa Santa Cruzan 2019 usa ka bunga sa kadasig ug pagtinabangay sa mga GKK Servant Leaders sa pagpadagan sa fund raising activity aron matubag ang importanteng panginahanglan sa katawhan sa parokya sama sa Pastoral Hall nga gamiton sa mga miting ug panagtapok sa nagkalain-laing ministriya. Siya nagpahayag sa iyang dakong pagpasalamat sa tanang mga parokyano labi na gayod sa mga ginikanan sa mga kandidata nga nitubag sa maong hagit. Labaw sa tanan, iyang gipasidunggan si Fr. Roger Duhaylungsod sa kanunay nga paggiya ug paghatag og bendisyon sa mga aktibidad sa parokya.

Ania ang unang pito nga nidaug sa Santa Cruzan 2019 nga gilangkuban sa 36 ka GKK:

1. Reyna Elena 2019 – Queenie Xyra Dangcalan kauban si Robert Roy Arante gikan sa GKK Virgen Del Pilar – Farland
2. Reyna De Las Flores – Blessy Limot kauban si Ais Vincent Bucod gikan sa GKK Santa Cruz
3. Reyna De Las Virgines – Patricia Mae Togon kauban si Roman Noel Ilustrisimo gikan sa GKK Christ the King – Dacoville
4. Reyna De Las Propetas – Maefleur Masugot kauban si Nobunaga Mori gikan sa GKK St. Mark
5. Reyna De La Paz – Jannah Marielle Sabay kauban si Yodai Kamaya gikan sa GKK Divine Mercy
6. Rosa Mystica – Andrea Ehler Retardo kauban si John Rhynier Risaba gikan sa GKK Immaculate Conception – Villa Kareena
7. Reyna De Las Estrellas – Gwennieth Mae Lazarte kauban si Albert Vallente gikan sa GKK Immaculate Conception – Rosalina 3

Sa katapusan, han-ay ang gipahigayong programa nga gidala sa duha ka miyembro sa Parish Youth Misnistry nga sila Raymond Tandoy ug Hera Arsenio isip Masters of the Ceremony. Gipanghinaot sa tanan nga magpadayon sa pagkamasadigon ang tanang parokyano sa Holy Family Parish. (Flor Arellano-Deloria | HFP SoCCom)