Mga batan-on ug hamtong nagkahiusa alang sa malampusong pagsaulog sa Fiesta sa Ascension

Nagkahiusa ang kabatan-onan ug mga hamtong sa pagpahigayon sa mga programa alang sa ika-18 nga kapistahan sa Ascension of the Lord Parish, Domingo, Hunyo 2, 2019.

Tema karong tuiga mao, “Ang Pagsaka sa Ginoo sa Langit nagpadyag sa pagkamaayong piniyalan sa mga gihigugma, gigasahan ug gigamhan nga katilingban.”

Tipik sa mga kalihukan mao ang gihimong novena pilgrimage sa matag zona diin dala sa matag GKK ang ilang patron nga giprosisyon padulong sa parokya sugod niadtong Mayo 24, 2019.

Gibilin ug gi-display sa matag kilid sa atubangan sa sulod sa simbahan ang matag imahe nga gidayan-dayanan ug mga maanindot nga mga bulak.

Atol sa bisperas, taliwala sa pag-ulan, gipadayon ang gitakdang prosisyon sa alas 4:30 ang takna sa hapon nga gipanguluhan ni Fr. Zenon Ampong, kura paroko.

Gipadayag ni Fr. Ampong ang iyang dako nga pasalamat sa tanan nga mga mitambong ug misalmot sa mga kalihukan ilabina sa novena pilgrimage nga gihimo sa 35 ka mga GKK.

Labaw nga mapasalamaton usab siya sa malampuson nga pagpahigayon sa programa atol sa kapistahan diin gihimo kini sa unang higayon sa parking area sa luyo sa simbahan.

Mismo ang mga kabatan-onan maoy nag-una sa pagpahigayon sa larong pinoy nga maoy nakapa-alegre sa maong programa.

Daghan usab ang gipang-apod-apod nga mga packed lunch ngadto sa mga namista samtang nagsalo-salo ang tanang mga mitambong gikan sa GKK.

Nahugyaw ang mga mitambong sa mga gidalit nga mga production numbers nga gi-unhan usab sa mga sakop sa parish youth animators ug ingon man sa dance number gikan sa tanang mga Pangulo sa Katilingban kon mga PSK nga gisundan sa mga sayaw sa matag GKK.

Atol sa pontifical mass sa alas-9 sa buntag nga gipanguluhan ni Msgr. Edgar Labagala, iyang gihagit ang tanan sa pagsunod kang Kristo nga sama kaniya, gikinahanglan nga mamatay aron nga mabanhaw ug hatagan og katawhan ug kaluwasan.

Ang maong sakripisyo, siya nagkanayon nga mao ang pagpadayag sa paghigugma sa Ginoo, ug mamahimong tinubdan sa inspirasyon sa pagpadayon sa tahas nga pagsabwag sa Maayong Balita isip usa ka hiniusang lawas ni Kristo.