Malampusong gisaulog ang ika-beinte singko sa katukuran sa San Miguel Parish Panacan

Duyog sa selebrasyon sa ika-beinte singko ka tuig sa katukuran sa parokya sa San Miguel Parish Panacan, usa ka dakong parada ang gipahihayon sa miaging Dominggo, Hunyo 16, 2019.

Gisugdan ang caravan o motorcade sa alas siete sa buntag didto sa Sun City. Gipangulohan sa Sasa Police Mobile, gisundan sa grupo sa KARANCHO ug Parish Coordinating Council nga mao ang nag-una sa parada nga gisundan sa 52 ka mga GKK, ministriya ug organisasyon.

Pagkahuman sa motorcade gisaulog ang Santos nga Misa nga gipangulohan sa among Kura Paroko Fr. Edsel Paloma.

Pagkahuman sa Santos nga Misa gisugdan ang programa sama sa mga padula, pahalipay ug mga kalingawan nga gisalmutan sa tanang mga GSL ug mga parokyano.

Matag zona adunay giandam nga mga pagkaon nga gisaw-an sa tanan. Makita gayud ang kahiusahan ug gugma sa matag usa ilabina sa pagbinayloay ug pag-inambitay sa mga pagkaon.

Malipayon nga nagpasalamat ang among kura paroko Fr. Edsel Paloma sa tanang nakigduyog sa kalihukan sa parokya ilabina sa kinatibuk-ang selebrasyon sa ika-beinte singko katuig sa Parokya didto sa Waterfront Hotel, Lanang ug ingon man sa gipahigayong motorcade ug salo-salo. Ug siya manghinaot sa matag parokyano sa pagpadayon sa madasigon nga suporta sa parokya sa San Miguel-Panacan. (Liz Gilbuena)