![OLMMP Our Lady of the Miraculous Medal parish Extraordinary Ministers of Holy Communion sending forth EMHC 2019](https://www.davaocatholicherald.com/wp-content/uploads/2019/07/OLMMP-EMHC-2019.jpg)
Lay Eucharistic Ministers, gipanalanginan ug gipadala
Ang 26 ka mga Lay Ministers o Extraordinary Ministers of Holy Communion (EMHC) sa Our Lady of the Miraculous Medal parish gipanalanginan ug gipadala. Gipahigayon kini atol sa ikatulo nga misa niadtong Hunyo 23, 2019 sa alas otso sa buntag. Diha sa homiliya ni Fr. Jess Samaniego, ang kura paroko sa maong parokya, nisaysay nga kining mga tawhana pinili gikan sa katilingban aron motabang sa mga kaparian sa pag-apod-apod sa Lawas ug Dugo ni Kristo panahon sa Santos nga Misa ug ngadto sa mga kaigsoonan nga adunay balatian ug dili na makahimo pag-adto sa simbahan.
Gisaysay usab sa Kura ang kahalangdon sa maong buluhaton isip tigpakalawat. Matod pa niya nga kinahanglan kalawaton sa tumang pagtahod ang Lawas ug Dugo ni Kristo tungod kay ang matuod nga presensya sa atong Ginoo anaa gayud sa Pan ug Bino. Atol usab sa sending forth, gibasa ni Fr. Jess ang appointment letter gikan sa atong halangdon nga Arsobispo sa Davao, nga nagpamatuod sa ilang katungdanan ug sila angayan nga mamahimong kaabag sa mga kaparian diha sa pagpakalawat.
Una pa ang pagpadala kanila sila miagi og mga seminars ug pormasyon alang sa maong buluhaton isip usa ka Lay Minister.
Human sa Santos nga Misa adunay salu-salo nga gipahigayon ang parokya alang kanila nga mga bag-ong gi-send forth uban sa ilang tagsa-tagsa ka pamilya. (Anabelle Encluna | OLMMP SoCCom)
No Comments