“Kamo ang maghatag kanilag pagkaon”

Pangilin sa Balaang Lawas ug Dugo ni Kristo
Gen. 14:18-20 / Sal. 110:1-4 / 1 Cor. 11:23-26 / Lk. 9:11-17

Niining mga milabay nga mga adlaw, atong nadunggan ang pagpasarado sa gitawag og scam sama sa Kapa, Rigen ug uban pa. Sumala pa sa mga awtoridad sa panggamhanan, sobra kaayo kataas ang tubo sa donasyon niini ug dili masabtan ang paghatag sa payout sa ingon niana ka dako nga kantidad. Sumala pa, kini nagtudlo sa mga tawo sa pagdawat sa dako nga pondo, human sila modonar sa mubo nga kantidad. Tungod niini, daghan ang niundang sa ilang naandang trabaho ug nagpaabot na lang sa payout.

Sa Ebanghelyo, atong nadungog nga dili angay nga magpaabot ang mga tinun-an, kondili, sila mismo ang unang molihok aron makahatag pagkaon. Gitudloan sila ni Hesus nga taliwala sa mga tawong nanginahanglan, ang iyang tinun-an kinahanglan maoy molihok aron pagtabang sa mga kabus.

Ang pagpakaon ni Hesus sa daghang tawo gikan sa diyutay nga pan, nagpasabot nga ang pagkabusog sa tawo dili gikan diha sa pan nga materyal lamang kondili diha sa pagdiskubre sa unsay iyang mahimo alang sa kaayohan sa uban. Ang pagpaambit ngadto sa uban bisan unsang diyutay nga anaa kanato maoy sinugdanan sa katagbawan. Kining maong katagbawan anaa sa pagdawat ni Hesus isip atong Dios. Ang iyang pagrespeto bisan sa mga nakalapas sa iyang sugo, ang iyang pagpasaylo kanila nga misalikway kaniya, ang iyang pagtabang sa mga walay ikabalos, ang iyang pagpakig-uban kanila nga gilikayan sa uban — kining tanan iyang gipikas aron ang tanan mabulahan. Kining pagpikas sa pan iyang gipakita diha sa pagsaulog sa misa diin atong gihandum ang iyang pagpakasakit sa krus sa kalbaryo.

Ikaw ba nagpaabot nga pasayloon apan dili gani makapasaylo? Naghulat ka ba nga sabton apan ikaw dili mosabot? Nagdahum ka ba nga modawat apan dili mohatag? Naghandum ka ba nga matabangan nga walay pagpaningkamot nga motabang? Ikaw mismo ang angay nga mopakaon ug mohatag sa uban kay ang Dios magapakaon kanimo.