Flores de Mayo culmination mabulokon

Masadya ug malipayon ang mga kabataan nga nitambong sa Culmination Activities sa Flores de Mayo sa St. Mary of the Perpetual Rosary Parish kaniadtong Mayo 25, 2019. Ang maong kalihukan gisugdan sa pag-ampo sa rosaryo sa mga kabataan inubanan sa mga katekista nga gipangulohan sa parish head catechist, Dionisia Devera ug ang paghalad og mga bulak ngadto sa Mahal na Birhen.

Ang tema sa Flores de Mayo culmination: “Maria, dalangpanan sa mga Kabataan nga nakigtagbo kang Hesus” nga diin mao kini ang tinguha sa mga kabataan nga makab-ot sa ilang pang adlaw-adlaw nga kalihukan.

Abtik ang mga kabataan sa pagtubag sa mga questions and answers nga gihimo sa parochial vicar, Rev. Fr. Rey T. Sabuero panahon sa iyang homily sa Santos nga Misa nga gipahigayon sa Shrine of Our Lady of the Most Holy Rosary. Sumala pa ni Fr. Rey mahinungdanon nga mapadayonon kining maong tradisyon aron mapalambo ang pagtoo sa matag-usa ilabina ang mga kabatan-onan nga maoy sumusunod nga mo-alagad sa Simbahan. Nagpasalamat si Fr. Rey sa mga kabataan nga nitambong sa maong kalihukan ug sa mga katekista nga boluntaryo sa pagtudlo sa mga kabataan, nga unta mapadayonon kini kanunay sa kapilya aron matugkad ang kagikan sa Flores de Mayo ngadto sa mga kabataan.

Pagkahuman sa Santos nga Misa madasigon nga nagpartisipar ang mga kabataan sa mga nagkadaiyang parlor games nga gipahigayon sa St. Mary Parish Sports for Peace and Livelihood Training Center. Nalipay ang mga kabataan nga nanambong tungod sa mga premyo ug give-aways nga nadawat nila ug ilabina ang pakig uban sa parochial vicar, Fr. Rey T. Sabuero. (Hermie Mapute | SMPRP SoCCom)