Flores de Mayo culmination – GKK Sta. Cruz

Aduna ba mo’y natun-an sa inyong Flores de Mayo? Pangutana ni Sharon Batoto, parish worker sa OMPH parish sa iyang paghatag og mensahe sa mga nigraduate sa Flores niadtong Mayo 29, 2019. Yes! Naa, dungang tubag sa mga kabataan. Example daw bi? Nitubag sila og “nakabalo na mi magrosaryo, love pa namo more si Mama Mary, atbp.”

Dasig kaayo ang mga kabataan nga buntag pa lang naa na sa kapilya alang sa ilang last day sa lecture ug alang sa pagpractice na pod sa ilang mga presentation numbers anang pagkagabii sa ilang culmination.

Modified Santa Cruzan ang ilang tema pero walay mga gown nga suot sila kon dili mga puti nga sinina lang pero ang mga babaye aduna sila’y mga korona nga gagmay except lang sa mga angels. Gibunot nila ang ilang mga role sa culmination. Sa mga nakabunot og mga Lady virtues aduna sila’y mga sash.

Nagprosesyon sila gawas ug sulod sa kapilya unya mga ginikanan ug kaparyentehan mao ang ilang mga audience apil pod diay ang mga youth nga nag-assist sa maong kalihukan nga nagsugod sa ikaduhang semana na sa Mayo tungod kay nagfiesta novena ug fiesta pa man ang GKK.

Sa mga naulahi og abot ilang naabtan nga nagrosaryo pa ang mga kabataan. Ang nakalahi lang para sa mga kanunay na nga tig-tambong mao ang back to back “pray over” nga gi-lead ni Brod Tito Opamin–PSL. Unang gi-alirongan, gipandungan ug giampoan ang mga kabataan dayon ang mga hamtong na usab ang sunod nga gi-ampoan sa mga kabataan.

Touching ang mga mensahe ug ang partisipasyon sa mga ginikanan nga nisuporta gayud sa maong kalihukan. Daghan ang mga pagkaon nga naa sa lamesa nga gisalohan sa tanan.

Makalingaw usab ang mga dance ug song numbers gikan sa mga ni-graduate. Lipay kaayo sila nga midawat sa ilang mga regalo para sa mga achievements nila sama sa perfect in attendance, best in quizzes, most dependable, most generous ug uban pa. Taas ang linya para sa mga souvenirs nga mga rosaryohan nga donated pod sa mga active residents sa NHA.

Adunay untay cut-off attendance ang mga makadawat sa souvenirs pero bisan giingnan na sila bahin niini wala kini nakababag niadtong mga concern students nga molinya ug mangayo gihapon. Nasukod ang policy implementation vs. gugma sa mga dili kaayo mosunod nga mga kabataan. Nipatingbabaw gihapon ang gugma ngadto kanila. Pildi si Mam Lorna Diego-PAP-FDM Incharge tungod kay gitagaan ra man gihapon niya sila kay “nalooy man siya”. Kagamay ra gyud sa kalipay sa mga bata makadawat lang ug plastic envelope nga naay notebook, ballpen, ruler, crayon ug papel maglukso-lukso na man sa kalipay.

Tungod niini makapamalandong ka nga sa sunod tuig maggahin na lang siguro ko ug budget para aning Flores para madugangan pa ang ilang madawat. Salamat sa mga taong nihalad sa ilang panahon, bahandi ug gugma aron nga mamahimong malampuson ug halangdumon ang culmination sa Flores de Mayo tungod kay ang Flores de Mayo makapasabot sa mga kabataan nganong gitagaan kini og panahon sa simbahan aron atong masaulog ang pagka-Inahan sa Kanunay’ng Panabang ni Maria, ang pinakamaanyag nga bulak sa bulan sa Mayo.

Congratulations graduates, mentors, parents, parish workers ug kaubang madre, youth and members of GKK Sta. Cruz. (Marieta V. Comighud | OMPH Parish SoCCom)