56 Ka Tuig nga Mabungahon ug Masadyaong Pagsaulog

Ang parokya ni San Antonio de Padua sa Agdao, mabungahon ug masadyaong gisaulog sa mga parokyano ug dili parokyano ang ikakalimaag unom nga kasumaran sa ilang kapistahan, niadtong miaging Huwebes, Hunyo 13, 2019 ubos sa tema: KRISTOHANONG MISYON SA gugma, gasa ug gahum uban sa diwa sa pag-ampo ug pagbag-o… Katambayayong SAN ANTONIO DE PADUA niining Tuig sa Batan-on.

Malipayong nakigsadya, nakig-ambit ug mipartisipar ang mga parokyano ug dili parokyano sa gibuhat nga mga paindigay ug paugnat sa kusog sama sa; 3on3 Basketball, Volleyball, Parlor Games ug Exhibition Games. Midula usab ang Davao Clergy ug Seminarians sa Teolohiya sa Saint Francis Xavier Regional Major Seminary o XaCoSe.

Zonal Booth competition
1st prize Zone 6, 2nd prize Zone 1, and 3rd prize Zone 2

Basketball games
1st prize Zone 5, 2nd prize Zone 8, and 3rd prize Parish staff

Volleyball games
1st prize Zone 9, 2nd prize Zone 7, and 3rd prize Zone 5

Volleyball Exhibition games nakuha sa Team Serena (coastal zones) ang ganti batok Team Diwata (upland zones). Sa Parlor Games, mga bata ug hamtong usab ang nag-indiganay.

Sa homiliya sa atong halangdong Arsobispo Romulo G. Valles, D.D, siya mapasalamaton nga ang pagsaulog sa kapistahan gitunong gyud sa iyang kasumaran, Hunyo 13. Si San Antonio usa ka milagroso, magtutudlo ug bantogang Santo. Usab iyang gipaambit kining tulo ka pamalandong nga naghagit kanatong tanan nga mamahimong Santo ug pagkabalaan dili lang diri sa Agdao, apan sa tanan. Nakighiusa usab ang mga kaparian sa Pontifial Mass nga sila: Fr. Bong Gonzaga, Fr. Manuel Trucio, Msgr. Edgar Labagala, Fr. Den-den Amoroso, Fr. Otik Escuadro, Fr. Allan nga usa ka relihiyoso ug Rev. Marvin Del Campo nga taga Agdao. Fr. Nestor Dalumpines kaabag nga Kura Paroko ug kang Fr. Amado Arroyo ang Kura Paroko sa San Antonio de Padua. Gipahigayon usab ang pagbendisyon sa bag-ong imahe nga ibutang sa façade sa parokya.

Sa katapusan, sa tanang nahilambigit sa atong kasaulogan sa ikakalimaag unom nga kapistahan sa atong patron, San Antonio de Padua, ang atong Kura Paroko, Padre Amado Arroyo ug ang iyang kaabag, Padre Nestor Dalumpines, uban ang Parish Pastoral Council, Parish Finance Council, Parish Staff ug tanang GKK Servant Leaders nga ipaabot kaninyo ang ilang mainiton ug kinasingkasing nga pagpasalamat sa pagpaambit sa inyong panahon, talento ug bahandi alang sa mabungahon ug makahuloganong pagsaulog sa atong kapistahan. Nga ang atong Ginoong Dios magabulig sa iyang piniling panalangin sa inyong dedikasyon ug kaakuhan.

Daghang salamat. (Gary Guivencan)