Pinakalayo nga GKK sa parokya nagsaulog sa youth cross

Gikan sa sentro Malabog padulong sa sitio Beto mokabat pa sa 16 kilometros una maabot sa ilang lugar. Walay sakyanan o motor makasulod sa ilang lugar tungod sa kalisod sa dalan kay lapok kung ting-ulan.

Ang GKK San Jose Sitio Beto, sa San Roque Parish, Malabog nagsaulog sa ilang ika-5 nga kapistahan ug pilgrimage sa youth cross, Mayo 1.

Walo ka pamilya ang membro niining GKK nga puro mga lumad. Kini ang pinakalayo nga GKK sa maong parokya. Patungas ug pababa ang imong maagian nga dili ka dayon makabalik sa Malabog kinahanglan tulugan gayod nimo ang maong lugar aron makapahulay ug makapadayon sa kalihukan.

Ang mga youth core group ug mga seminarians ang nag-una sa pag-adto nga gipangulohan ni seminarian Junrey Bustamante. Nagpahigayon og youth cross ug first time kini nasinati sa mga batan-on sa GKK. Nag Bible sharing ug nagpaambitan sa usag-usa.

Nisunod sila Fr. Arnold Balaquinto uban sa mga pangulo nga sakop sa Sona 6 didto aron pagpahigayon og katekesis sa bunyag ug pagsaulog sa Santos nga Misa. Upat ka mga bata ang gibunyagan niadtong higayuna.

Matod pa sa usa ka datu sa mga lumad isa ra ka relihiyon ilang gidawat sa ilang lugar para ang ilang pagtoo magkahiusa. Kay kung magkalain-lain man ang mga tinoohan diha magsugod ang gubot.

Matod pa ni Sis. Azeneth Aranez, isa sa batan-on nga nakauban didto, “nindot ang mga tao o membro nila tungod kay nagkahiusa sila, nagtinabangay sa isig kasilingan, ug unsay mga trabahoon magtabok-tabok kini aron matabangan ang kauban.” (Imelda Overiz)