Pagpalig-on sa Pagpangalagad Tumong sa General Assembly

Kapin sa 500 ka GKK Servant Leaders ug Parish Pastoral officers ug members ang ni-attend sa General Assembly nga gipatigayon sa Sto. Rosario Parish of Toril, May 19, 2019 sa Sto. Rosario Pastoral Center. Tumong niini ang pagpalig-on sa pagpangalagad sa matag-usa nga lideres.

Sa unang bahin nagpadayag ang mga lideres sa ilang kasinatian sa GKK. Matod pa ni Sis. Elizabeth Llego, PSK, nga makaluya tungod sa gamay ra ang motambong sa Kasaulogan Sa Pulong. Nakumpara usab niya nga kung Civic Organization ang maghatag og activity daghan ang moadto.

Luyo sa mga negatibong kasinatian aduna ang kalipay diha sa pagpangalagad maong maluntaron ang pagpangalagad sa matag usa.

Sa pamahayag ni Father Vic Gilay nga ang pagpangalagad kinahanglan mahisubay sa pagpangalagad ni Hesus. Angay nga atong huptan ang kinaiya nga dili hakog, dili isipan nga pagpangalagad. Dili unta kita magtan-aw og ganti. Atong ibutang sa atong kasingkasing nga ang atong ganti didto sa langit uban kang Kristo Hesus.

Gipasabot usab sa maong Asembleya ang Guidelines and Norms on the GKK ilabina sa paghatag og Identification Data Sheet (IDS) ug ang Liturgical and other Celebrations sa GKK.

Mapasalamaton si Sis. Merriam Cabillon, PSK Coordinator, nga nakapaambit ang tanang GSL sa ilang mga kasinatian diha sa pagpangalagad. Ang ilang mga pangutana natagaan og kasulbaran diha sa gipatigayon nga open forum.

Luyo sa 40 ka tuig nga pagserbisyo sa simbahan ug sa GKK ni Nanay Leonila Zamora malipayon gayud siya nga daghan pa siya ug nakat-onan sa maong Asembleya.

Gitapos ni Father Vic Gilay pinaagi sa usa ka hagit nga kinahanglan ang matag usa mobasa gayud sa GKK Norms and Guidelines ug ang red book nga The Sacraments. (Juneva P. Ardepolla | SRP Toril SoCCom)